Angliya Premyer Ligasida fevral oyining eng yaxshilari aniqlandi

Angliya Premyer Ligasi fevral oyining eng yaxshilari nomini ma’lum qildi.

“Nyukasl” ustozi Eddi Hau Angliya Premyer Ligasining fevral oyidagi eng yaxshi murabbiyi deb topildi. Angliyalik mutaxassis qo‘l ostida jamoa 3 g‘alaba va bitta durang natija qayd etdi.

Haudan tashqari eng yaxshi murabbiy bo‘lish uchun Mikel Arteta (“Arsenal”, 3 g‘alaba), Ralf Hazenhyuttl (“Sauthempton”, 3 g‘alaba va bitta durang) va Yurgen Klopp (“Liverpul”, 4 g‘alaba) kabi murabbiylar kurash olib borgandi.

Eslatib o‘tamiz, dekabr oyining eng yaxshi murabbiyi “shaharliklar” ustozi Pep Gvardiola bo‘lgan edi. Yanvar oyida esa “Vulverhempton” ustozi Brunu Laje ushbu e’tirofga loyiq ko‘rilgandi.

“Liverpul” himoyachisi Joel Matip esa fevral yakunlariga ko‘ra, oyning eng yaxshi futbolchisi deb topildi. 31 yoshli himoyachi mersisaydliklar safida fevral oyida bitta golli uzatma va bitta gol muallifiga aylandi.

Matipdan tashqari ushbu sovrin uchun Chi Adams (“Sauthempton”, 3 ta gol va bitta golli uzatma), Rayan Freyzer (“Nyukasl”, bitta gol va bitta golli uzatma), Harri Keyn (“Tottenhem”, 3 ta gol va bitta golli uzatma), Ben Mi (“Byornli”, bitta gol) va Uilfred Zaha (“Kristal Pelas”, 3 ta gol) kabi futbolchilar da’vogar edi.

Dekabr oyida mazkur sovrinni “Manchester Siti” vingeri Rahim Sterling, yanvarda esa “Manchester Yunayted” posboni David de Xea qo‘lga kiritgandi.