Avvalroq Visa va Mastercard kartalari faoliyatining Rossiyada to‘xtatilishi xalqaro o‘tkazmalar, shu jumladan, O‘zbekistonga ham ta’sir qilishi haqida xabar berilgan edi. Yana nimalar o‘zgardi – “Daryo” sharhida.
Visa’dan Visa’ga pul o‘tkazishning endi iloji yo‘q
So‘nggi yillarda bir necha banklar O‘zbekistonda chiqarilgan Visa kartalaridan Rossiyada chiqarilgan Visa kartalariga pul o‘tkazish imkonini beruvchi xizmatlarni taqdim etgan edi. Bu banklarning mobil ilovalari orqali amalga oshirilar edi. Visa o‘z faoliyatini Rossiyada 11-mart kuni to‘xtatgani tufayli bunday xizmat endi mavjud emas.
Western Union faoliyati to‘xtatildi, ammo boshqalar ishlashda davom etadi
Kompaniya Rossiyadan chiqib ketgani tufayli, pul mablag‘larini Western Union orqali yuborish yoki olish imkoniyati endi mavjud emas. “Zolotaya Korona” (u Rossiya kompaniyasi) Contact, Unistream va boshqalar faoliyati davom etadi.
Biroq bu yerda ham ba’zi cheklovlar bor — sanksiya e’lon qilingan banklarda (“VTB”,“Rossiya”,“Otkritiye”,“Novikombank”,“Promsvyazbank”,“Sovkombank”,“VEB.RF”) pul o‘tkazmalarini amalga oshirishning iloji yo‘q.
“MIR” kartalari o‘rtasida pul o‘tkazish mumkin
2020-yili Uzcard va “MIR” kartalari o‘rtasida o‘tkazmalar yo‘lga qo‘yilgandi, biroq 2022-yilning fevral oyi oxirida mazkur xizmat vaqtincha to‘xtatildi.
Bundan tashqari, O‘zbekiston banklari Uzcard-“MIR” kartlarini ham chiqarmoqda. Kartalar bir necha mamlakatlarda qabul qilinadi (masalan, Turkiya), ulardan xalqaro o‘tkazmalar uchun ham foydalanish mumkin.
Pul miqdoriga nisbatan cheklovlar
Xalqaro kompaniyalarning sanksiya va boykotlaridan tashqari, Rossiyaning o‘zida ham ma’lum cheklovlar o‘rnatildi.
9-martdan boshlab Rossiyada naqd ko‘rinishdagi valyutani sotib olishning iloji yo‘q. Ushbu cheklov 9-sentabrgacha amal qiladi.
Yana oldinroq Rossiyadan boshqa mamlakatlarga, shu jumladan O‘zbekistonga oyiga 5 000 dollardan ortiq pul o‘tkazmalarini amalga oshirish taqiqlandi. Mazkur taqiq 31-martgacha joriy qilingan.
Boshqa yo‘llar
Paysend, Wise va shu kabi xizmatlar mavjud, biroq ular to‘lov tizimlari faoliyatiga bog‘liqdir. Bundan tashqari bankdan bankga pul o‘tkazish imkoniyati mavjud.
Avvalroq O‘zbekistonga amalga oshiriladigan pul o‘tkazmalari oqimi, kutilayotganidek, 21 foizga qisqargani, bu mamlakat iqtisodiyotiga salbiy ta’sir qilishi mumkinligi haqida xabar berilgan edi.
Izoh (0)