Аввалроқ Visa ва Mastercard карталари фаолиятининг Россияда тўхтатилиши халқаро ўтказмалар, шу жумладан, Ўзбекистонга ҳам таъсир қилиши ҳақида хабар берилган эди. Яна нималар ўзгарди – «Дарё» шарҳида.
Visa’дан Visa’га пул ўтказишнинг энди иложи йўқ
Сўнгги йилларда бир неча банклар Ўзбекистонда чиқарилган Visa карталаридан Россияда чиқарилган Visa карталарига пул ўтказиш имконини берувчи хизматларни тақдим этган эди. Бу банкларнинг мобил иловалари орқали амалга оширилар эди. Visa ўз фаолиятини Россияда 11 март куни тўхтатгани туфайли бундай хизмат энди мавжуд эмас.
Western Union фаолияти тўхтатилди, аммо бошқалар ишлашда давом этади
Компания Россиядан чиқиб кетгани туфайли, пул маблағларини Western Union орқали юбориш ёки олиш имконияти энди мавжуд эмас. «Золотая Корона» (у Россия компанияси) Contact, Unistream ва бошқалар фаолияти давом этади. Бироқ бу ерда ҳам баъзи чекловлар бор — санкция эълон қилинган банкларда пул ўтказмаларини амалга оширишнинг иложи йўқ.
«МИР» карталари ўртасида пул ўтказиш мумкин
2020 йили Uzcard ва «МИР» карталари ўртасида ўтказмалар йўлга қўйилганди, бироқ 2022 йилнинг февраль ойи охирида мазкур хизмат вақтинча тўхтатилди.
Бундан ташқари, Ўзбекистон банклари Uzcard-«МИР» картларини ҳам чиқармоқда. Карталар бир неча мамлакатларда қабул қилинади (Масалан, Туркия), улардан халқаро ўтказмалар учун ҳам фойдаланиш мумкин.
Пул миқдорига нисбатан чекловлар
Халқаро компанияларнинг санкция ва бойкотларидан ташқари, Россиянинг ўзида ҳам маълум чекловлар ўрнатилди.
9 мартдан бошлаб Россияда нақд кўринишдаги валютани сотиб олишнинг иложи йўқ. Ушбу чеклов 9 сентябргача амал қилади.
Яна олдинроқ Россиядан бошқа мамлакатларга, шу жумладан Ўзбекистонга ойига 5 000 доллардан ортиқ пул ўтказмаларини амалга ошириш тақиқланди. Мазкур тақиқ 31 мартгача жорий қилинган.
Бошқа йўллар
Paysend, Wise ва шу каби хизматлар мавжуд, бироқ улар тўлов тизимлари фаолиятига боғлиқдир. Бундан ташқари, Россия банки SWIFT’дан чиқарилмаган тақдирда банкдан банкга пул ўтказиш имконияти мавжуд.
Аввалроқ Ўзбекистонга амалга ошириладиган пул ўтказмалари оқими, кутилаётганидек, 21 фоизга қисқаргани, бу мамлакат иқтисодиётига салбий таъсир қилиши мумкинлиги ҳақида хабар берилган эди.
Изоҳ (0)