Toshkent viloyatida tojikistonlik narkokuryerning 9 kilodan ortiq giyohvand moddasini haq evaziga sotib bermoqchi bo‘lgan ikki kishi ushlandi. Bu haqda O‘zA xabar berdi.
Ma’lum qilinishicha, DXXning Toshkent viloyati bo‘yicha boshqarmasi xodimlari tomonidan viloyat bojxona boshqarmasi bilan hamkorlikda Zangiota tumani hududida o‘tkazilgan tezkor tadbirda Samarqand viloyatining Urgut tumanida yashovchi ikki fuqaro (1990-yilda tug‘ilgan) 9,1 kilogramm opiy giyohvand moddasini 54 ming dollarga sotayotgan vaqtida ushlangan.
Aniqlanishicha, ular muqaddam tojikistonlik narkokuryer tomonidan kontrabanda yo‘li bilan Urgut tumani hududiga o‘tkazilib, xufiyona joyga yashirib qo‘yilgan ushbu giyohvand moddani xaridorga berib, undan olingan pulni tojikistonlik narkosavdogarga yetkazib berishlari evaziga 2700 dollar olishlari kerak bo‘lgan.
Toshkent viloyatida kuzatilgan yana bir holatda esa “Tramadol” psixotrop dori vositasining Qozog‘istondan olib kelingan katta miqdordagi partiyasi savdosiga chek qo‘yilgan.
Xususan, Zangiota tumanida yashovchi fuqaro (1985-yilda tug‘ilgan) 19 360 dona “Tramadol”ni sotmoqchi bo‘lganida ushlangan. Uning yonida qo‘shimcha 40 dona hamda yashash manzilida esa 20 250 dona shunday tabletkalar borligi aniqlanib, protsessual tartibda rasmiylashtirib olingan. Bundan tashqari, uning jinoiy sherigi, muqaddam sudlangan fuqaro (1980-yilda tug‘ilgan) ham qo‘lga olingan.
Tezkor tadbir davomida olib qo‘yilgan jami 39 650 dona “Tramadol” dori vositasining umumiy qiymati 800 million so‘mni tashkil etadi.
Mavzuga doir:
Izoh (0)