Navoiy viloyati hokimining qarori bilan Malika Mamadiyorova viloyat hokimining o‘rinbosari — oila va xotin-qizlar boshqarmasi boshlig‘i vazifasini bajaruvchi etib tayinlandi. Bu haqda viloyat hokimligi matbuot xizmati xabar berdi.
Malika Mamadiyorova tayinlovga qadar Navoiy viloyati Mahalla va oilani qo‘llab-quvvatlash boshqarmasi boshlig‘ining birinchi o‘rinbosari vazifasida ishlab kelayotgan edi.
Shuningdek, Buxoro viloyati hokimining qarori bilan Firuza Ibragimova viloyat hokimining o‘rinbosari — oila va xotin-qizlar boshqarmasi boshlig‘i vazifasini bajaruvchi etib tayinlangan.
Firuza Ibragimova 1970-yil 24-noyabrda Buxoro shahrida tug‘ilgan. 1992-yilda Buxoro davlat pedagogika institutini tugatgan.
U 1993—2015-yillarda Buxoro davlat tibbiyot institutida ishlagan. 2015—2018-yillarda Oliy Majlis Qonunchilik palatasining Agrar va suv xo‘jaligi masalalari hamda Fuqarolarning sog‘lig‘ini saqlash masalalari qo‘mitalari a’zosi sifatida, 2018—2020-yillarda Buxoro viloyati hokimi o‘rinbosari — viloyat Xotin-qizlar qo‘mitasi raisi lavozimlarida faoliyat olib borgan.
Firuza Ibragimova ushbu tayinlovga qadar viloyat Mahalla va oilani qo‘llab-quvvatlash boshqarmasi boshlig‘ining birinchi o‘rinbosari vazifasida ishlab kelayotgan edi.
Avvalroq Andijon, Surxondaryo, Qashqadaryo, Samarqand, Toshkent hamda Xorazm viloyati hokimlariga yangi o‘rinbosarlar — viloyat oila va xotin-qizlar boshqarmasi boshliqlari tayinlangani to‘g‘risida xabar berilgandi.
Izoh (0)