9-mart kuni Ukrainadan Polshaning Katovitse aeroporti orqali 245 nafar O‘zbekiston fuqarosi, shu jumladan, 35 nafar ayol, 20 nafar voyaga yetmagan shaxs va 3 nafar chaqaloq olib kelindi. Bu haqda O‘zbekiston TIV rasmiy vakili ma’lum qildi.
Ta’kidlanishicha, 28-fevraldan 10-martga qadar 22 ta aviareys tashkillashtirilgan hamda harbiy harakatlar kechayotgan hududlardan 5 282 nafar O‘zbekiston fuqarosi vatanga qaytarilgan.
Moldova hududida bo‘lgan 94 nafar fuqaro O‘zbekiston diplomatlari hamrohligida Moldova—Ruminiya chegarasini kesib o‘tgan. Ularni maxsus reys bilan Buxarest aeroportidan evakuatsiya qilish rejalashtirilgan.
Avvalroq Ukrainaning Moldova bilan chegaradosh joylarida yashovchi 200 ga yaqin o‘zbekistonlik boshpana izlab, Moldova hududiga o‘tgani to‘g‘risida xabar berilgandi. Mamlakat insonparvarlik nuqtayi nazaridan, fuqaroligidan qat’i nazar, o‘z hududiga kirayotgan barcha shaxslarni tashish, joylashtirish, ovqatlantirish va boshqa zarur masalalarda ko‘mak bermoqda. Keyinroq O‘zbekiston TIV rasmiy vakili Moldova hududida bo‘lib turgan O‘zbekiston fuqarolarini olib chiqish masalasini ishlab chiqish boshlanganini ma’lum qilgandi.
Izoh (0)