Marhum sportchi, 2012-yilda o‘tkazilgan sambo bo‘yicha o‘smirlar o‘rtasidagi jahon chempionati g‘olibi Kamoliddin Rasulov o‘limi yuzasidan 2022-yilning 8-fevral kuni boshlangan sud majlisi 9-mart kuni o‘z ishini davom ettirdi, deya xabar berdi “Daryo” muxbiri.
Sud muzokarasida so‘z olgan prokuror Nodir Rustamov sportchi o‘limida ayblanayotgan shaxsga 20 yil muddatga ozodlikdan mahrum qilish jazosini so‘radi.
Sambo bo‘yicha jahon chempioni 29 yoshli Kamoliddin Rasulov 2021-yilning 13-sentabr kuni soat 21:30 da Toshkent shahrining Uchtepa tumanidagi ko‘p qavatli uylar oldida boshqa bir sportchi tomonidan pichoqlab o‘ldirilgandi. Bosh prokuratura axborot xizmatining rasmiy ma’lumotida chempion yigitning pichoqlanishiga uning gumonlanuvchi tanishiga “Humo Trop” vitaminini tavsiya qilgani, oqibatda esa gumonlanuvchining sog‘lig‘i yomonlashgani, shifokorlar bu kasallikning davosi yo‘qligini bildirgani haqida xabar berilgandi.
Jinoyat ishlari bo‘yicha Uchtepa tuman sudida so‘z olgan guvoh ham tanishi, sudda ayblanuvchi sifatida ishtirok etayotgan Sh.T. marhum Kamoliddin Rasulov tavsiya qilgan vitaminni aytilgan miqdordan ko‘ra ko‘proq iste’mol qilgani sabab sog‘lig‘i yomonlashganini, kechalari issig‘i chiqib, uxlolmaydigan bo‘lib qolganini aytdi. Voqea sodir bo‘lgan kuni pichoqdan jarohatlangan sportchini ikki kishi quvlab ketayotganini jamoatchilikka oshkor qilgan “Markaziy studiya” ko‘rsatuvi muxbiriga intervyu bergan noma’lum suhbatdosh esa vitaminni qabul qilgan sportchiga shifokorlar endi o‘lasan, deb aytishganini, sportchi shu sabab men o‘lsam, uyam o‘ladi, deya marhumni pichoqlaganini aytgandi.
“Daryo” shu o‘rinda O‘zbekiston Respublikasi Sudyalar oliy kengashiga murojaat qilib, marhum sportchi Kamoliddin Rasulov o‘limida ayblanayotgan shaxs ishini ko‘rib chiqayotgan sud OAV jurnalisti huquqlarini poymol qilayotganini bildiradi.
Sportchi o‘limi bilan bog‘liq voqeani ko‘rib chiqayotgan sud OAVning sudda qatnashishi uchun rasmiy xat bilan chiqishi lozimligi haqida noto‘g‘ri talab qo‘ygani yetmagandek, nashr vakilining sud jarayonlariga o‘z vaqtida kirishiga ham to‘siq qo‘ymoqda. Jumladan, sud vakillari 2022-yilning 9-mart kuni soat 17:00 da boshlanishi kutilgan sudga borgan nashr muxbirini har xil bahonalar bilan o‘z vaqtida ichkariga kiritmagan. Jurnalistning sud binosini qo‘riqlayotgan Milliy gvardiya xodimlariga takroriy ravishda eslatishlaridan so‘ng, sud vakili muxbirning ichkariga kirishiga ruxsat bergan. Holbuki, bu vaqtda sud muzokarasida so‘z olgan prokuror nutqi yakunlangan bo‘lgan.
Mavzuga doir:
- “Dahshatli qotillik ko‘z o‘ngimda ikki kishi tomonidan sodir etildi. Ammo ikkinchi shaxs sudda ko‘rinmayapti”. Marhum sportchi Kamoliddin Rasulovning xotini qotillik voqeasi haqida
- “Avvaliga qochdi, keyin o‘zi taslim bo‘ldi”. Marhum sportchi Kamoliddin Rasulov o‘limi bilan bog‘liq voqeani o‘rganayotgan sudda IIB xodimlari ko‘rsatma berdi
- Chempion yigit Kamoliddin Rasulov o‘limida ayblanayotgan shaxs kurashchi Sherali Jo‘rayev bilan ham adovatda bo‘lgan
- “Har kuni o‘lib-tirilgandan ko‘ra o‘sha kuni bir marta o‘lishga rozi edim” — pichoqlab o‘ldirilgan sportchi Kamoliddin Rasulovning bevasi
- “Kamoliddin sotgan vitamindan so‘ng o‘rtog‘imning yuragi sekin urayotgani, jigari kattalashgani aytilgandi”. Marhum sportchi o‘limi yuzasidan bo‘lib o‘tayotgan sudda dori voqeasi esga olindi
- “Kimdir yordam berarmikan, deb yig‘lab yordamga chaqirdim. Ammo hech kim kelmadi, hatto PPX xodimlari ham qarab turishgandi”. Toshkentda o‘ldirilgan sportchining bevasi sudda voqea qanday bo‘lganini aytib berdi
Izoh (0)