Toshkent shahrida jinoyat ishi bo‘yicha bir shaxsga chora ko‘rmaslik evaziga pul talab qilgan tergovchi qo‘lga olindi. Bu haqda Bosh prokuratura matbuot kotibi “Daryo”ga ma’lum qildi.
Ta’kidlanishicha, huquqni muhofaza qiluvchi organlar Toshkent shahar IIBB shaxsiy xavfsizlik boshqarmasi xodimlari bilan hamkorlikda tezkor tadbirlar o‘tkazgan. Tadbir davomida 5-mart kuni Chilonzor tumani IIO FMB huzuridagi Tergov bo‘limi tergovchisi ish yurituvidagi jinoyat ishi bo‘yicha bir shaxsga chora ko‘rmaslik evaziga 5 ming dollar talab qilgani aniqlangan. U mazkur pulning ming dollarini olgan vaqtida ushlangan.
Shuningdek, 8-mart kuni Mirobod tumani IIO FMB 4-son IIB profilaktika inspektori huquqbuzarlik sodir etgan ayolga holatni rasmiylashtirmaslik evaziga 500 dollar talab qilib, dastlab 6-mart kuni 200 dollarni qo‘lga kiritgan va qolgan 300 dollarni olgan vaqtida ushlangan.
Har ikkala holat bo‘yicha Jinoyat kodeksining 210-moddasi (pora olish) bilan jinoyat ishi qo‘zg‘atilgan. Gumonlanuvchilar protsessual tartibda ushlangan.
Avvalroq Qashqadaryoda neft mahsulotlari yo‘qolganini tekshirayotgan tergovchiga 1,3 ming dollar pora bergan korxona operatori ushlangani to‘g‘risida xabar berilgandi.
Mavzuga doir:
- Samarqandda mahkum IIB Probatsiya noziriga pora berishga urindi (video)
- “Jinoyatini yashirishga uringanlar javobgarlikdan qutilish maqsadida OAVda yolg‘on ma’lumot tarqatgan”. Qashqadaryo prokuraturasi sobiq IIB mansabdorining qo‘lga olinishi haqida yozdi
- “To‘qqiz nafar IIB xodimi nopok harakati uchun ishdan olingan” — Buxoro viloyat IIB boshlig‘i
- Samarqandda 50 ming dollar evaziga DXXga ishga kiritib qo‘ymoqchi bo‘lgan shaxs qo‘lga olindi