Surxondaryo viloyatining Sariosiyo tumanida temuriylar davriga oid mis tangalar topilgani to‘g‘risida xabar berilgandi. Bosh prokuratura matbuot kotibi Hayot Shamsutdinovning yozishicha, mazkur mis tangalar Mirzo Ulug‘bek hukmronligi (XV asr) davrida zarb etilgani aniqlangan.
Sariosiyo tumani “Alisher Navoiy” mahallasida yashovchi mahalliy aholi To‘polondaryo yoqasidan qadimiy tangalar topib, bu haqda tuman hokimligiga ma’lum qilgan.
“To‘polondaryo Janubiy Hisor tog‘ tizmasidan boshlanuvchi yirik suv sig‘imiga ega daryo bo‘lib, Sariosiyo tumanining ‘Alisher Navoiy’ mahallasi hududiga yetib kelganda ancha sayozlashadi. Daryo ayni kunda butunlay qurib qolgani bois shu mahallada yashovchi aholi daryodan tosh olib chiqib, qurilishda foydalanadi. Shunday kunlarning birida odamlar toshlar orasidan tangalar topib olgan”, — deydi Turizm va madaniy meros vazirligi huzuridagi Madaniy meros agentligi rahbari o‘rinbosari Tursunali Qo‘ziyev.
“Manzildagi qidiruv ishlari Bosh prokuratura tomonidan nazoratga olingan”, — deb yozadi Hayot Shamsutdinov.
Izoh (0)