“‘Boqimanda odamlar bilan ishlash asabimni charchatadi’, ‘Investorlar jalb qilishda qiynalyapman’, ‘Qishloq xo‘jaligi baribir qiyin’”. O‘zbekistondagi ayol hokimlarning nozik tomonlari nimada?

O‘zbekistonda 2020-yildan boshlab hokimlikka ayol rahbarlarni tayinlash amaliyoti joriy etildi. O‘tgan davr mobaynida respublikaning oltita viloyatidagi shahar va tumanlar, jumladan, Andijonning Bo‘ston, Namanganning To‘raqo‘rg‘on, Sirdaryo viloyatining Boyovut, Buxoroning Olot tumani, Qashqadaryoning Qarshi tumanlarida ayol hokimlar faoliyat yuritdi. Ayni kunga kelib Qarshi tumani hokimi Maqsuda Mustafoyeva ishdan olingan bo‘lsa, To‘raqo‘rg‘on hokimi qo‘mita raisligiga o‘tdi.

“Daryo” muxbirlari ayni kunda faoliyat yuritayotgan ayol hokimlar — Andijon viloyatining Bo‘ston tumani hokimi Sanobarxon Nosirova, Samarqand viloyatining Kattaqo‘rg‘on shahri hokimi, senator Gavhar Alimova hamda Sirdaryo viloyati Boyovut tumani hokimi senator Dilfuza O‘ralovalar bilan suhbatlashib, hokimlikning ayol uchun muammo tug‘diradigan jihatlarini so‘radi.

Boqimanda odamlar bilan ishlaganda asablarim ancha toliqadi. Shunday odamlar bilan suhbatlashganimda, “bu insonlar nega noshukr, mehnat qilib, intilsa bo‘lmaydimi?”, degan savol tug‘iladi. Barcha sohalarda bo‘layotgan islohotlarni ko‘rib turib, ko‘rmaslikka oladigan odamlarning fikrlariga hayron qolaman. To‘g‘risi, ijtimoiy tarmoqlarda shunday insonlar yozayotgan bemaza gap-so‘zlarga asabim dosh bermaydi. Sa’y-harakatlarimizni ko‘rib, qo‘llab-quvvatlaydigan, iliq so‘zlar aytadigan fuqarolardan esa kuch olaman.

Bizning hududda ishsizlik darajasi achna yuqori. Kattaqo‘rg‘onga 35-40 yil davomida respublikadan umuman yordam ko‘rsatilmagan. Ko‘plab ishlab chiqarish obyektlari xususiylashtirib yuborilgan. Meni ishsizlik va uy-joy masalalari qiynaydi. Biroq bu bo‘yicha bir yil davomida qator loyihalarni amalga oshirishni maqsad qilganmiz va harakatlar boshlangan. So‘zim yakunida shuni aytmoqchimanki, Kattaqo‘rg‘on shahri aholisiga ayol hokim sifatida ta’zim qilaman. Sababi ular meni juda ham yaxshi qabul qilishdi, ayolligim sabab kamsitish yoki yordam ko‘rsatmaslik holatlariga uchramadim.

Gavhar Alimova, Kattaqo‘rg‘on shahri hokimi, senator

Aslida ta’lim sohasidan chiqqan bo‘lsam-da, ko‘p yillar turli yo‘nalishlarda ishladim, tajriba orttirdim. Har bir sohaning ichiga kirib boraverish kerak ekan. Natijani esa vaqt va amaldagi harakatlar ko‘rsatar ekan. Bugungi kunda tumanga investorlarni jalb qilishda oqsoqligimiz borligini bildim. Boshqa mamlakatlarning tajribasini o‘rganish, xorijiy tillarni bilish zarur ekan. Qiyinchiliklar bo‘lishiga qaramay, investorlar bilan ish olib borishga harakat qilyapmiz. Bu harakatlarimiz orqali tumandagi ishsizlar ishli bo‘ladi, hudud rivojlanadi.

Dilfuza O‘ralova, Sirdaryo viloyati Boyovut tumani hokimi, senator

O‘zim dehqon oilasida tug‘ilganman. Dala ishlarini ham yaxshi tushunaman. Mutaxassisligim bo‘yicha agronomman. 1992-yil Andijondagi paxtachilik institutini qizil diplom bilan tamomlaganman. Shunday bo‘lsa ham qishloq xo‘jaligi bo‘yicha o‘rinbosarim, fermerlar kengashi raisi va shu sohaga aloqadar shaxslar bilan birga ishlamasam bo‘lmaydi, ularsiz qiynalib qolaman. Hozirgi kunda g‘allachilik klasteri ustida bosh qotirishimizga to‘g‘ri kelyapti. Chunki g‘allachilik klasteri bo‘yicha tizim endi tashkil qilinmoqda. Bo‘ston tumani qishloq xo‘jaligiga ixtisoslashgan tuman. 2021-yil tuman meva sabzavot ekporti bo‘yicha rejani bajarolmagan. Meva-sabzavot yetishtirish bo‘yicha klaster tizimini yaratmasam, g‘allachilik klasteri ishini tezroq tashkil qilmasam men uchun ham bu qiyinchiliklar barataraf etilmaydigan muammo bo‘lib qolaversadi. Meni qiynab turgani shu ikki muammo, xolos.

15 yil deputat bo‘lganman, shu yillar davomida xalq orasida bo‘ldim. Shuning uchun hokimlik tizimi menga unchalik ham qiyinchilik tug‘dirgani yo‘q. Qolaversa, sobiq hokim marhuma Sadbar opa boshlab qo‘ygan ishlarning hammasi tizimli tashkil qilingani uchun chala qolmagan. Biz ham 2022—2026-yillar oralig‘ida Bo‘ston tumanini ijtimoiy-iqtisodiy rivojlantirish to‘g‘risida konsepsiya ishlab chiqqanmiz. Bunda ustuvor yo‘nalishlar belgilab qo‘yilgan. Buni o‘zimning xalqqa qilgan murojaatimda ham aytib o‘tganman.

Umidjon Mamarasulov hamda Mirolim Isajonovlar suhbatlashdi.