Samarqand viloyatining Narpay tumanida xizmat vazifasini bajarayotgan YPX xodimini haqorat qilib, uning faoliyatiga to‘sqinlik qilgan haydovchining shaxsi aniqlandi, deb xabar beradi viloyati IIB matbuot xizmati.
Ma’lum qilinishicha, Samarqand viloyati IIB YHXB YPX otryadi Mobil qurilmalardan foydalanish guruhi haydovchi-operatori 20-fevral kuni tasdiqlangan taqsimotga asosan Narpay tumani hududida multiradar o‘rnatilgan avtomobilda o‘z vazifasini barajayotgan bo‘lgan.
Noma’lum transport vositasi haydovchisi uning oldiga kelib, hech bir sababsiz xizmat vazifasini bajarayotgan IIO xodimiga nisbatan qo‘pol munosabatda bo‘lib, uni haqorat qilgan.
Mazkur holat yuzasidan IIV Shaxsiy xavfsizligi bosh boshqarmasi Samarqand viloyati boshqarmasi tomonidan o‘rganish ishlari olib borilgan. O‘rganishlar davomida ushbu shaxs Narpay tumani “Qoraxitoy” qishlog‘ida yashovchi 28 yoshli fuqaro ekani va u holatni tasvirga olib, internetga joylashtirgani aniqlangan.
To‘plangan hujjatlar jinoyat ishlari bo‘yicha Narpay tuman sudida ko‘rib chiqilgan. Sud qaroriga ko‘ra, ushbu fuqaro Ma’muriy javobgarlik to‘g‘risidagi kodeksning 195-moddasida (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) nazarda tutilgan huquqbuzarlikni sodir etgan deb topilgan va 10 sutka ma’muriy qamoq jazosi tayinlangan. Shuningdek, fuqaroni qamoqda saqlash bilan bog‘liq xarajat uchun har bir kuni BHMning 15 foizi miqdorida, ya’ni 405 ming so‘m davlat daromadiga pul undiriladi.
Bundan tashqari, fuqaro davlat organi xodimining sha’niga putur yetkazuvchi so‘zlar aytgani va IIO xodimini haqorat qilgani yuzasidan to‘plangan hujjatlar prokuraturaga yuborilgan, holat yuzasidan qo‘shimcha tekshiruv harakatlari olib borilmoqda.
Avvalroq Qashqadaryoda YPX xodimlari bilan janjallashgan haydovchi 14 sutkaga qamalgani, Samarqandda haydovchining telefonini tortib olishga uringan YHXB xodimiga xizmat tekshiruvi tayinlangani to‘g‘risida xabar berilgandi.
Mavzuga doir:
Izoh (0)