O‘zbekistonning Rossiyadagi elchixonasi xabariga ko‘ra, konsullik bo‘limining Call-markaziga Ukraina hududidan Rossiyaga xalqaro avtomobil nazorat punktlari orqali o‘ta olmayotgan avtomobil tashuvchi o‘zbekistonliklardan murojaatlar kelib tushmoqda. Bu haqda “Dunyo” axborot agentligi xabar qildi.
Qayd etilishicha, kelib tushayotgan murojaatlar asosida ro‘yxatlar tuzilib, Rossiya Tashqi ishlar vazirligiga Ukraina—Rossiya davlatlararo chegarasida XANP orqali transport vositalarining o‘tishiga yordam berish so‘rovi bilan rasmiy ravishda murojaat qilinmoqda. Bir vaqtning o‘zida ushbu masalalar bo‘yicha Rossiya Mudofaa vazirligi bilan ham ish olib borilmoqda.
Ayni paytda Rossiya tomoni ko‘magida o‘zbekistonlik 12 nafar avtotashuvchi mamlakatga kiritilgan. Ularning 8 nafari Ukrainaning Sumi viloyatida, 3 ta avtomobil Xarkov viloyatida, 1 ta avtotransport Rossiya chegarasidan Ukrainaga o‘tuvchi “Nexoteyevka” neytral hududining nazorat o‘tkazish punktida bo‘lgan.
5 nafar O‘zbekiston fuqarosi Ukraina hududining chegaradan uzoqroq masofadagi 4 ta yuk mashinasida bo‘lib turibdi. Vaziyat barqarorlashib, xavfsiz o‘tish imkoniyati yuzaga kelgach, ularning chegaraga yetib kelishi kutilmoqda.
Avvalroq Gruziya—Rossiya chegarasidagi “Yuqori Lars” nazorat-o‘tkazish punktini kesib o‘tishda haydovchilarning Rossiya hududiga kirishiga ruxsat bermaslik holatlari davom etayotgotgani sabab O‘zbekistonning Ozarbayjondagi elchixonasi xalqaro yuk tashuvchilarga ogohlantirish bilan chiqqandi. Qayd etilishicha, bunday harakatlarga chegarani kesib o‘tayotgan haydovchi Rossiya qonunchiligini buzgani, jumladan, turli jarimalarni to‘lamagani uchun deportatsiya qilinganlar ro‘yxatiga kiritilgani sabab bo‘ladi. Elchixona xalqaro yuk tashuvchilarga Rossiya hududiga Ozarbayjon va Gruziya orqali reyslarni amalga oshirishdan oldin kirishga taqiq yo‘qligi tekshirib olishni tavsiya qilgan.
Eslatib o‘tamiz, O‘zbekiston Ukrainadagi fuqarolarini Polsha orqali evakuatsiya qilmoqda. 28-fevral kuni 6-martga qadar 15 ta aviareys bilan 3 685 nafar fuqaro vataniga qaytarildi. Fuqarolarni mamlakatga olib kelish uchun tashkil etilayotgan maxsus aviareyslar uchun chiptalar bepul hisoblanadi.
Ma’lumot uchun, Polsha hududida evakuatsiya qilinishini kutayotgan O‘zbekiston fuqarolari 15-martgacha ushbu mamlakatni tark etishi zarur. Polshadan aholini evakuatsiya qilish bo‘yicha maxsus komissiya boshidanoq evakuatsiya uchun muhlatni shu muddatgacha belgilagan. Keyin esa chet el fuqarolari uchun vizasiz tartib tugaydi va jarimalar qo‘llanishi boshlanadi.
O‘zbekistonning Ukrianadagi elchisi Alisher Kurmanovning ma’lum qilishicha, Ukrainadan evakuatsiya qilinayotgan uch nafar o‘zbekistonlik Polsha chegarasida avtohalokatga uchragan. Oqibatda ulardan biri vafot etgan.
Izoh (0)