Respublika shoshilinch tibbiy yordam ilmiy markazining Qashqadaryo filialida murakkab transplantatsiya jarrohlik amaliyoti o‘tkazildi. 43 yoshli akaning bir buyragi 41 yoshli bemor singilga ko‘chirib o‘tkazildi. Bu haqda “Daryo”ga viloyat sog‘liqni saqlash boshqarmasi axborot xizmati rahbari Nuriddin Egamov xabar berdi.
“Yakkabog‘lik 41 yoshli bemor ayolda surunkali buyrak yetishmovchiligi kuzatildi. U o‘n to‘rt oy davomida haftasiga ikki marotaba gemodializ seanslarini olib, davolanib kelayotgandi. Ayolga 43 yoshli akasi donor bo‘lishga — bir buyragini berishga qaror qildi. Kerakli tekshiruvlardan so‘ng shifokorlar operatsiyani Qarshida tashkil etishdi. Respublika shoshilinch tibbiy yordam ilmiy markazi bosh direktori, tibbiyot fanlari doktori Davron To‘laganov, markaz xirurgiya bo‘limi rahbari, professor Farhod Hojiboyev rahbarligidagi 13 kishilik guruh operatsiyani muvaffaqiyatli yakunladi”, — deydi filial direktori, tibbiyot fanlari nomzodi Doniyor Tursunov.
Ma’lum qilinishicha, operatsiya 7 soatdan ko‘proq vaqt davom etgan.
“Amaliyot yakunidan so‘ng bir necha daqiqa o‘tgach, ko‘chirib o‘tkazilgan buyrak ishladi — peshob ajralishi kuzatildi. Ayni paytda aka-singilning ahvoli yaxshi. Ular va yaqinlarining quvonchi cheksiz”, — deydi viloyat sog‘liqni saqlash boshqarmasi boshlig‘i, tibbiyot fanlari nomzodi Ravshan To‘lakov.
Eslatib o‘tamiz, prezident Shavkat Mirziyoyevning 2021-yil 4-oktabrdagi “Xirurgiya xizmatini transformatsiya qilish, hududlarda jarrohlik amaliyotlari sifatini oshirish va ko‘lamini kengaytirish chora-tadbirlari to‘g‘risida”gi qaroriga ko‘ra, 2022-yil yakuniga qadar barcha hududlarda buyrak transplantatsiyasi amaliyotini yo‘lga qo‘yish ko‘zda tutilgandi.
Izoh (0)