Ўзбекистоннинг Россиядаги элчихонаси хабарига кўра, консуллик бўлимининг Call-марказига Украина ҳудудидан Россияга халқаро автомобиль назорат пунктлари орқали ўта олмаётган автомобиль ташувчи ўзбекистонликлардан мурожаатлар келиб тушмоқда. Бу ҳақда «Дунё» ахборот агентлиги хабар қилди.
Қайд этилишича, келиб тушаётган мурожаатлар асосида рўйхатлар тузилиб, Россия Ташқи ишлар вазирлигига Украина—Россия давлатлараро чегарасида ХАНП орқали транспорт воситаларининг ўтишига ёрдам бериш сўрови билан расмий равишда мурожаат қилинмоқда. Бир вақтнинг ўзида ушбу масалалар бўйича Россия Мудофаа вазирлиги билан ҳам иш олиб борилмоқда.
Айни пайтда Россия томони кўмагида ўзбекистонлик 12 нафар автоташувчи мамлакатга киритилган. Уларнинг 8 нафари Украинанинг Суми вилоятида, 3 та автомобиль Харьков вилоятида, 1 та автотранспорт Россия чегарасидан Украинага ўтувчи «Нехотеевка» нейтрал ҳудудининг назорат ўтказиш пунктида бўлган.
5 нафар Ўзбекистон фуқароси Украина ҳудудининг чегарадан узоқроқ масофадаги 4 та юк машинасида бўлиб турибди. Вазият барқарорлашиб, хавфсиз ўтиш имконияти юзага келгач, уларнинг чегарага етиб келиши кутилмоқда.
Аввалроқ Грузия—Россия чегарасидаги «Юқори Ларс» назорат-ўтказиш пунктини кесиб ўтишда ҳайдовчиларнинг Россия ҳудудига киришига рухсат бермаслик ҳолатлари давом этаётготгани сабаб Ўзбекистоннинг Озарбайжондаги элчихонаси халқаро юк ташувчиларга огоҳлантириш билан чиққанди. Қайд этилишича, бундай ҳаракатларга чегарани кесиб ўтаётган ҳайдовчи Россия қонунчилигини бузгани, жумладан, турли жарималарни тўламагани учун депортация қилинганлар рўйхатига киритилгани сабаб бўлади. Элчихона халқаро юк ташувчиларга Россия ҳудудига Озарбайжон ва Грузия орқали рейсларни амалга оширишдан олдин киришга тақиқ йўқлиги текшириб олишни тавсия қилган.
Эслатиб ўтамиз, Ўзбекистон Украинадаги фуқароларини Польша орқали эвакуация қилмоқда. 28 февраль куни 6 мартга қадар 15 та авиарейс билан 3 685 нафар фуқаро ватанига қайтарилди. Фуқароларни мамлакатга олиб келиш учун ташкил этилаётган махсус авиарейслар учун чипталар бепул ҳисобланади.
Маълумот учун, Польша ҳудудида эвакуация қилинишини кутаётган Ўзбекистон фуқаролари 15 мартгача ушбу мамлакатни тарк этиши зарур. Польшадан аҳолини эвакуация қилиш бўйича махсус комиссия бошиданоқ эвакуация учун муҳлатни шу муддатгача белгилаган. Кейин эса чет эл фуқаролари учун визасиз тартиб тугайди ва жарималар қўлланиши бошланади.
Ўзбекистоннинг Укрианадаги элчиси Алишер Курмановнинг маълум қилишича, Украинадан эвакуация қилинаётган уч нафар ўзбекистонлик Польша чегарасида автоҳалокатга учраган. Оқибатда улардан бири вафот этган.
Изоҳ (0)