Rossiya Federatsiyasining Smartavia va iFly aviakompaniyalarining O‘zbekistonga amalga oshiriladigan parvozlari vaqtincha bekor qilindi. Bu haqda Fuqaro aviatsiyasi agentligi xabar qildi.
Qayd etilishicha, ikki aviakompaniya O‘zbekiston fuqaro aviatsiyasi aerodromlariga bir martalik parvozni amalga oshirish uchun ruxsatnomalarga ega. Ammo Smartavia aviakompaniyasi 7-mart kuniga rejalashtirilgan Moskva—Urganch—Moskva yo‘nalishidagi parvoz bajarilmasligi yuzasidan rasmiy ma’lumot berdi.
Shuningdek, iFly aviakompaniyasi 5-mart sanasidan boshlab O‘zbekistonga bajarilishi kutilayotgan hamda barcha rejalashtirilgan yo‘nalishlarda o‘z parvozlarini noma’lum muddatga to‘xtatdi. Aviakompaniya bu haqdagi rasmiy ma’lumotni O‘zbekiston aviatsiya ma’muriyatiga taqdim etdi.
“Bekor bo‘lgan aviaqatnovlar yo‘lovchilari aviachipta pullarini qaytarish yoki chiptalarini boshqa muddatga qayta bronlash masalalari yuzasidan ushbu chiptalarni xarid qilgan aviakassalarga murojaat etishlari tavsiya etiladi”, — deyiladi xabarda.
Eslatib o‘tamiz, 24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun “maxsus harbiy operatsiya” boshlanganini e’lon qildi. Shundan so‘ng AQSh prezidenti Jo Bayden Rossiyaga nisbatan yangi sanksiyalar joriy qilgan. 27-fevral kuni 20 ta davlat Rossiya samolyotlari uchun o‘z havo hududini yopishini e’lon qildi. Boeing Rossiya aviakompaniyalariga ehtiyot qismlar yetkazib berish va texnik xizmat ko‘rsatishni to‘xtatdi.
Shundan so‘ng Rossiya ham bir qator davlatlar uchun havo hududini yopdi, bir qator aviaqatnovlar bekor qilindi. Jumladan, Rossiyaning S7 Airlines kompaniyasi O‘zbekistonga barcha reyslarni may oyigacha bekor qildi.
Izoh (0)