Yevropa Ittifoqi Rossiyaning yetti banki SWIFT tizimidan uzib qo‘yilgani va mamlakatga yevro ajratish taqiqlanganini e’lon qildi

Yevropa Ittifoqi Rossiyaning Ukrainada maxsus harbiy operatsiyalarini boshlagani tufayli joriy qilingan sanksiyalar doirasida 12-martdan boshlab mamlakatning yettita bankini SWIFT banklararo to‘lovlar tizimidan uzib qo‘yilishini e’lon qildi.

Ro‘yxatga “VTB”, “Rossiya”, “Otkritiye”, “Novikombank, “Prosmvyazbank”, “Sovkombank” hamda Rossiya taraqqiyot korporatsiyasiga (sobiq “Vneshekonombank”) kiritilgan.

Shuningdek, Yevroittifoqning rasmiy jurnalida Rossiya jismoniy va yuridik shaxslaridan mahsulotlar xarid qilish, ularni yetkazib berish va eksport qilishga ham taqiqlar qo‘yilgani, davlat tuzilmalarining yevro banknotasidan foydalanishi ham cheklangani qayd etilgan.

Taqiq Rossiyaga oilasi bilan kelgan va u yerda sayohat qilayotgan jismoniy shaxslar va ularning oilalariga, shu bilan birga, diplomatik missiyalar, konsulliklar va xalqaro tashkilotlarda faoliyat olib borayotganlarga taalluqli emas.

Yevroni olib chiqib ketishga nisbatan taqiq Yevroittifoq rasmiy jurnalida mazkur qaror haqidagi axborot e’lon qilingan vaqtdan boshlab kuchga kirgan.

“VTB” SWIFT’dan uzib qo‘yilishi Rossiya hududidagi bank mijozlari bilan munosabatlarga ta’sir ko‘rsatmasligini ma’lum qilgan.

“Rossiyadagi barcha mijozlarimizning operatsiyalari Rossiya banki, Milliy to‘lov kartalari tizimi hamda moliyaviy xabarnomalar uzatish tizimi vositasida qayta ishlanadi, shu sababli mijozlar odatiy bank, moliyaviy operatsiyalarni har qanday savdo nuqtalarida amalga oshirishlari mumkin”, — deyiladi bank bayonotida.

Shuningdek, “VTB” avvalroq xorijdagi mijozlariga elektron hisobdagi mablag‘larini bankomatlardan naqdlashtirib olishni tavsiya qilganini eslatgandi, deya bayonotdan iqtibos keltirgan “Interfaks”. Ayni vaqtda “VTB” mijozlarining xorijga pul o‘tkazmalarini yetkazib berish xizmatlari ish faoliyatida emas.

Avval Yevroittifoq Rossiyaga qarshi yangi sanksiyalarni e’lon qildi: ayrim banklar SWIFT tizimidan uziladi, Markaziy bank aktivlari esa “falajlantirilishi”, Yevropa Ittifoqi Rossiyaning 7 ta bankini SWIFT’dan uzish masalasini muhokama qilayotgani, Rossiyaning sanksiyaga uchragan banklari Visa va Mastercard kartalarini chiqara olmasligi haqida xabarlar berilgan.