Европа Иттифоқи Россиянинг етти банки SWIFT тизимидан узиб қўйилгани ва мамлакатга евро ажратиш тақиқланганини эълон қилди

Европа Иттифоқи Россиянинг Украинада махсус ҳарбий операцияларини бошлагани туфайли жорий қилинган санкциялар доирасида 12 мартдан бошлаб мамлакатнинг еттита банкини SWIFT банклараро тўловлар тизимидан узиб қўйилишини эълон қилди.

Рўйхатга «ВТБ», «Россия», «Откритие», «Новикомбанк, «Просмвязбанк», «Совкомбанк» ҳамда Россия тараққиёт корпорациясига (собиқ «Внешекономбанк») киритилган.

Шунингдек, Евроиттифоқнинг расмий журналида Россия жисмоний ва юридик шахсларидан маҳсулотлар харид қилиш, уларни етказиб бериш ва экспорт қилишга ҳам тақиқлар қўйилгани, давлат тузилмаларининг евро банкнотасидан фойдаланиши ҳам чеклангани қайд этилган.

Тақиқ Россияга оиласи билан келган ва у ерда саёҳат қилаётган жисмоний шахслар ва уларнинг оилаларига, шу билан бирга, дипломатик миссиялар, консулликлар ва халқаро ташкилотларда фаолият олиб бораётганларга тааллуқли эмас.

Еврони олиб чиқиб кетишга нисбатан тақиқ Евроиттифоқ расмий журналида мазкур қарор ҳақидаги ахборот эълон қилинган вақтдан бошлаб кучга кирган.

«ВТБ» SWIFT’дан узиб қўйилиши Россия ҳудудидаги банк мижозлари билан муносабатларга таъсир кўрсатмаслигини маълум қилган.

«Россиядаги барча мижозларимизнинг операциялари Россия банки, Миллий тўлов карталари тизими ҳамда молиявий хабарномалар узатиш тизими воситасида қайта ишланади, шу сабабли мижозлар одатий банк, молиявий операцияларни ҳар қандай савдо нуқталарида амалга оширишлари мумкин», — дейилади банк баёнотида.

Шунингдек, «ВТБ» аввалроқ хориждаги мижозларига электрон ҳисобдаги маблағларини банкоматлардан нақдлаштириб олишни тавсия қилганини эслатганди, дея баёнотдан иқтибос келтирган «Интерфакс». Айни вақтда «ВТБ» мижозларининг хорижга пул ўтказмаларини етказиб бериш хизматлари иш фаолиятида эмас.

Аввал Евроиттифоқ Россияга қарши янги санкцияларни эълон қилди: айрим банклар SWIFT тизимидан узилади, Марказий банк активлари эса «фалажлантирилиши», Европа Иттифоқи Россиянинг 7 та банкини SWIFT’дан узиш масаласини муҳокама қилаётгани, Россиянинг санкцияга учраган банклари Visa ва Mastercard карталарини чиқара олмаслиги ҳақида хабарлар берилган.