Ukrainaning Rossiya ustidan shikoyati — genotsidda ayblovlar ishi bo‘yicha birinchi ochiq tinglovlar sanasi belgilandi. Bu haqda sud matbuot xizmati xabar berdi.
Gaagadagi Xalqaro sudda 7—8-mart kunlari Ukrainaning Rossiyaga qarshi shikoyati bo‘yicha tinglovlar bo‘lib o‘tadi.
“Birlashgan Millatlar Tashkilotining asosiy sud organi bo‘lmish Xalqaro sud ‘Genotsid jinoyatining oldini olish va jazolash to‘g‘risida’gi konvensiyaga muvofiq Ukrainaning Rossiyaga qarshi genotsid ayblovlari bo‘yicha 2022-yil, 7-mart, dushanba va 8-mart, seshanba kunlari Gaagadagi tinchlik saroyida ochiq tinglovlar o‘tkazadi”, — deyiladi bayonotda.
Qayd etilishicha, tinglovlar Ukrainaning vaqtinchalik choralarni joriy etish to‘g‘risidagi so‘roviga bag‘ishlanadi. Shu bilan birga, COVID-19 pandemiyasi tufayli uchrashuvlar gibrid formatda o‘tkaziladi, ishda tomonlarning vakillari shaxsan yoki videoaloqa orqali ishtirok etadi. BMT sudi Rossiyani Ukraina bilan nizo doirasida profilaktik choralar ko‘rishga tayyorlanishga ham chaqirdi.
27-fevral kuni Ukraina Rossiya ustidan Xalqaro sudga rasman da’vo arizasini bergandi. Unda o‘z tajovuzni oqlash maqsadida genotsid tushunchasini buzib ko‘rsatgani uchun Rossiyaning javobgarlikka tortilishi talab qilingan.
1-mart kuni Gaaga sudi prokurori tez orada Ukrainadagi vaziyatni tekshirishni boshlashi haqida e’lon qildi.
Shu kuni Rossiya tashqi ishlar vaziri Sergey Lavrovning BMT konferensiyasidagi nutqi translyatsiyasi qilinayotgan paytda 40 ga yaqin G‘arb davlati va ularning ittifoqchilaridan, jumladan, Yaponiyadan kelgan 100 dan ortiq diplomatlar Rossiyaning Ukrainaga bosqiniga norozilik sifatida Rossiya vakiliga boykot e’lon qilib, zalni tark etdi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)