To‘qayev Olmaotadagi prezident qarorgohini buzib tashlashni buyurdi. Yanvardagi tartibsizliklar chog‘ida binoga o‘t qo‘yilgandi

2022-yilning yanvarida Qozog‘istonda sodir bo‘lgan norozilik namoyishlari vaqtida Olmaotada yoqib yuborilgan prezident qarorgohi buzib tashlanib, o‘rniga skver quriladi. Bu haqda davlat rahbarining matbuot kotibi Berik Uali ma’lum qildi.

“Qosim-Jo‘mart To‘qayevning qaroriga ko‘ra, bosqinchi va terrorchilar yanvardagi voqealarda vayron qilib, yoqib yuborgan Olmaota shahridagi xizmat qarorgohi buzib tashlanadi. Uning o‘rniga shaharliklar uchun skver quriladi”, — deb yozadi u o‘zining Instagram’dagi sahifasiga.

2022-yilning fevralida Prezident ishlari departamenti matbuot xizmati bir necha ming namoyishchi 5-yanvar kuni bostirib kirgan qarorgoh 2022-yil yakuniga qadar qayta tiklanishini ma’lum qilgandi.

Ma’lumotlarga ko‘ra, binoning birinchi qavati yonib ketgan va u yerga olib kirilgan avtomobil portlagan. Yuqoriga ko‘tarilgan olov yuqori qavatlardagi po‘lat konstruksiyalarni eritib yuborgan. Binodagi barcha tizimlar ishdan chiqqan. Shu bilan birga, Qozog‘iston ko‘p tarmoqli rekonstruksiya va taraqqiyot instituti mutaxassislari obyektni texnik ko‘rikdan o‘tkazish vaqtida asosiy konstruksiyalarni “xavfsizlik va seysmik barqarorlikka putur yetkazmasdan almashtirishning imkoni borligini” aniqlagan.

Eslatib o‘tamiz, Qozog‘istonda 2-yanvar kuni gaz narxi keskin oshishi sababli ommaviy norozilik namoyishlari boshlanib, bir necha kundan so‘ng ular tartibsizliklarga aylangandi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatilgan.

Mamlakatdagi keskinlik munosabati bilan To‘qayev KXShT (Kollektiv xavfsizlik shartnomasi tashkiloti)ga murojaat qilib, yordam so‘radi. Tashkilot cheklangan muddatga respublikaga tinchlikparvar kontingent yuborgandi. Shuningdek, To‘qayev tartibsizliklar sabablarini o‘rganuvchi, aybdorlarni aniqlovchi va javobgarlikka tortuvchi tergov guruhini tuzishni buyurgan. Davlat rahbarining so‘zlariga ko‘ra, tartibsizliklar ishtirokchilari xorijda malaka oshirgan.

Qozog‘iston Ichki ishlar vazirligining xabar berishicha, maxsus operatsiyalar davomida 4000 nafarga yaqin terrorchi hibsga olingan,  26 nafar “qurolli jinoyatchi” o‘ldirilgan, yana 18 nafari yarador qilingan. Qozog‘iston Bosh prokuraturasi ommaviy tartibsizliklar, shuningdek, terrorchilik aktlarini sodir etish bo‘yicha tergov doirasida jinoiy ish qo‘zg‘atdi.