Bellingcat surishtiruv guruhi a’zosi Xristo Grozevning aytishicha, Ukrainaning Xarkov shahridagi Ozodlik maydoniga tashlangan qanotli raketa shakli va o‘lchami jihatidan Rossiyaning “Kalibr” raketasiga o‘xshaydi.
Bellingcat raketa kelib tushishi paytida olingan tasvirlarni o‘rganib chiqib, shunday xulosaga kelgan. “Ukrainada bunday raketalar yo‘qligi hammaga ma’lum”, — dedi Grozev.
Xarkovdagi viloyat ma’muriyati binosi joylashgan Ozodlik maydoniga raketa hujumi 1-mart kuni ertalab sodir etilgandi. Portlash oqibatida yetti kishi halok bo‘ldi, 20 dan ortiq odam jarohatlandi. Ukraina prezidenti Vladimir Zelenskiy raketa zarbasini “ochiqdan ochiq terror” deb atadi.
Rossiyaning qator ommaviy axborot vositalarida rus harbiylarning “Xarkovdagi portlashga aloqasi yo‘qligi” haqida maqolalar chop etilgan.
24-fevral kuni Rossiya prezidenti Vladimir Putin Donbass aholisini himoya qilish, Ukrainani “demilitarizatsiya” va “denasifikatsiya qilish” uchun “maxsus harbiy operatsiya” boshlanganini e’lon qildi. Kreml gap “harbiy salohiyatni zararsizlantirish” va “Ukrainani natsistlardan tozalash” haqida ketayotganini tushuntirdi. Putinning bayonotidan keyin Ukraina shaharlari bir necha bor o‘qqa tutildi. Rossiya Mudofaa vazirligi bunga aloqadorligini rad etmoqda.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)