Tashqi ishlar vazirligi Ukrainaning qaysi shaharlaridan O‘zbekiston fuqarolarini evakuatsiya qilishda qiyinchiliklar yuzaga kelayotgani haqida ma’lumot berdi.
Qayd etilishicha, fuqarolardan evakuatsiya qilishda qaysi shaharlarda muammolar kuzatilayotgani haqida savol kelib tushgan. Bunga TIV rasmiy vakilining javobi quyidagicha:
Faol harbiy harakatlar olib borilayotgan Ukrainaning ayrim aholi punktlaridan, xususan, Xarkov, Sumi va Xerson shaharlaridan fuqarolarimizni evakuatsiya qilishda qiyinchiliklar yuzaga keldi. Fuqarolarni yuqoridagi shaharlardan olib chiqish harbiy harakatlar to‘liq tugaganidan keyin tashkil etiladi. Ushbu davrgacha himoyalangan bunkerlarda qolish tavsiya etiladi. Fuqarolarimiz joylashgan boshqa shaharlarda ularning Lvovga poyezdda jo‘nab ketishini tashkil etish ishlari olib borilmoqda. Kiyevdan yurtdoshlarimizni olib ketish uchun o‘zbekistonlik ko‘ngillilar va Elchixonaning avtomashinalaridan foydalanilmoqda.Shuningdek, Yusup Kabuljanov “Kiyev shahri butunlay qamal qilingani aytilmoqda, bu evakuatsiya ishiga qanday ta’sir ko‘rsatadi?”, savoliga ham javob bergan:
Kiyevda va ayniqsa, uning chekka hududlaridagi murakkab vaziyatga qaramay, fuqarolarimizni vokzalga yetkazish ishlari davom etmoqda. Kiyevdan g‘arbiy yo‘nalishdagi poyezd qatnovlari ham to‘xtatilmagan.
Izoh (0)