Ташқи ишлар вазирлиги Украинанинг қайси шаҳарларидан Ўзбекистон фуқароларини эвакуация қилишда қийинчиликлар юзага келаётгани ҳақида маълумот берди.
Қайд этилишича, фуқаролардан эвакуация қилишда қайси шаҳарларда муаммолар кузатилаётгани ҳақида савол келиб тушган. Бунга ТИВ расмий вакилининг жавоби қуйидагича:
Фаол ҳарбий ҳаракатлар олиб борилаётган Украинанинг айрим аҳоли пунктларидан, хусусан, Харьков, Суми ва Херсон шаҳарларидан фуқароларимизни эвакуация қилишда қийинчиликлар юзага келди. Фуқароларни юқоридаги шаҳарлардан олиб чиқиш ҳарбий ҳаракатлар тўлиқ тугаганидан кейин ташкил этилади. Ушбу давргача ҳимояланган бункерларда қолиш тавсия этилади. Фуқароларимиз жойлашган бошқа шаҳарларда уларнинг Львовга поездда жўнаб кетишини ташкил этиш ишлари олиб борилмоқда. Киевдан юртдошларимизни олиб кетиш учун ўзбекистонлик кўнгиллилар ва Элчихонанинг автомашиналаридан фойдаланилмоқда.Шунингдек, Юсуп Кабулжанов «Киев шаҳри бутунлай қамал қилингани айтилмоқда, бу эвакуация ишига қандай таъсир кўрсатади?», саволига ҳам жавоб берган:
Киевда ва айниқса, унинг чекка ҳудудларидаги мураккаб вазиятга қарамай, фуқароларимизни вокзалга етказиш ишлари давом этмоқда. Киевдан ғарбий йўналишдаги поезд қатновлари ҳам тўхтатилмаган.
Изоҳ (0)