Qoraqalpog‘istonning Beruniy tumanida 23-fevral kuni noqonuniy bug‘u ovlagan shaxslar ushlandi. Bu haqda Qoraqalpog‘iston Ekologiya qo‘mitasi xabar qildi.
Qayd etilishicha, shu kuni chamasi soat 04:30 da “Biybozor” ovuli hududidagi o‘rmon xo‘jaligiga yondosh joyda miltiqning otilgan ovozi haqida rezervat xodimlariga xabar kelib tushgan. Xodimlar miltiq ovozi chiqqan taxminiy joyga yetib borgan. Atrofni ko‘zdan kechirish jarayonida shu yerdagi ichki asfalt yo‘lida qon izlarini ko‘rgan. Shuningdek, ular fermer xo‘jaligiga tegishli bug‘doy dalasining yonidagi ariqda tuzoq izlarini ham aniqlagan. Inspektorlar qon izlari bo‘ylab asfaltda 4 km va tuproq yo‘lda mototsikl izi bilan taxminan 2 km atrofida yo‘l yurgan.
Izlanish natijasida rezervat xodimlar fermer xo‘jaligi dalasi yonidagi ariq ichida bir dona Buxoro bug‘usining so‘yilgan boshi, oyoqlari, terisi va ichki a’zolarini aniqlagan. Holat bo‘yicha Orol tabiatni muhofaza qilish prokuraturasi va Beruniy tumani IIBga xabar qilingan.
Xodimlar mototsikl izi bilan borib, transport vositasi izi borib to‘xtagan uyni aniqlagan. Uyda davlat raqami yo‘q qizil rangli motosikli turgani va bu motosikl ushbu xonadonda yashovchi A.Sh.ga tegishli ekani ma’lum bo‘lgan. Mototsikl ko‘zdan kechirilganda yaxshilab yuvilgani, lekin ba’zi joylarida qon dog‘lari va hayvon junlari borligi aniqlangan.
Tergov davomida Sh.A. haqiqatan ham shu kuni bir dona Buxoro bug‘usini otganini tan olgan va uyidan bir dona hujjatsiz ov miltig‘ini hamda bir juft Buxoro bug‘usi shoxini olib chiqib bergan.
U so‘roq davomida qonunbuzarlikni sherigi, “Oltinsoy” ovulida yashovchi K.M. (1996-yilda tug‘ilgan) bilan birga sodir etganini tan olgan. K.M. so‘roq qilinganda Sh.A. bergan ko‘rsatmalarni to‘liqligicha tasdiqlagan.
Holat bo‘yicha Orol tabiatni muhofaza qilish qilish prokuraturasi tomonidan Sh.A. va K.M.ga nisbatan to‘plangan materiallar protsessual tartibda rasmiylashtirilib, qonunchilikda belgilangan tartibda huquqiy baho berish uchun olib ketilgan. Hozirda o‘rganish ishlari olib borilmoqda.
Izoh (0)