Sirdaryo viloyatida ikkita sher bolasini noqonuniy olib ketayotgan ikki fuqaro ushlangani, ular olib qo‘yilib, vaqtincha saqlash uchun belgilangan joyga joylashtirilgani haqida xabar berilgan edi. “Ekolog.uz” Telegram-kanalining yozishicha, sherlarning egasi ular noqonuniy olib qo‘yilgan deb hisoblamoqda va qaytarib berishlarini so‘rab Davlat Ekologiya qo‘mitasi raisi Nazrullo Oblomurodovga ariza yozgan.
Arizada aytilishicha, Toshkentda yashovchi fuqaro B.L. sherlarni saqlash uchun tegishli guvohnomaga ega. U Sirdaryo viloyatiga sheriklari bilan navbatdagi ish faoliyati bilan borganida ikkita sher bolasiga tegishli hujjatlarni ko‘rsatganiga qaramay, bojxona xodimlari tomonidan olib borilgan reyd doirasida sherlar undan kuch ishlatib olib qo‘yilgan.
“Ekolog.uz” Telegram-kanalida keltirilgan ma’lumotga ko‘ra, B.L. ga haqiqatan ham 2021-yil 14-yanvarda Davlat ekologiya qo‘mitasining “Yovvoyi hayvonlarni saqlash va urchitish bo‘yicha pitomniklarning, shuningdek, zoologiya kolleksiyalarining hisobiga qo‘yilganligi to‘g‘risida” gi guvohnomasi berilgan.
Biroq Sirdaryo viloyat Ekologiya va atrof-muhitni muhofaza qilish boshqarmasi reyd tadbiri davomida sher bolalari fuqaro B.L.dan ularning hech qanday hujjatlari mavjudmasligi, ularning pasportlari, emlanganlik to‘g‘risidagi ma’lumotlari taqdim qilinmagani hamda belgilangan tartibda sher bolalari qafaslarda bo‘lmagani uchun olib qo‘yilganini ma’lum qilgan.
Milliy gvardiya xabarida keltirilishicha, reyd M-34 yo‘lining Sirdaryo tumanidan o‘tuvchi qismida bojxona, DXX va Ekologiya va atrof-muhitni muhofaza qilish boshqarmalari xodimlari hamkorligida o‘tkazilgan.
Tadbir davomida 24 yoshli fuqaro X.B. o‘ziga tegishli Nexia-3 da 2 dona sher bolasini 6500 dollarga sotish uchun oldindan kelishilgan joyga olib ketayotgan vaqtda tadbir ishtirokchilari tomonidan ashyoviy dalillar bilan qo‘lga olingan.
Hozirda sher bolalari belgilangan tartibda Toshkent viloyati hayvonot qo‘riqxonasiga topshirilgan, holat yuzasidan tergov oldi surishtiruv ishlari Sirdaryo viloyati bojxona boshqarmasi tomonidan olib borilmoqda.
Izoh (0)