Tashqi ishlar vazirligi rasmiy vakili Ukrainadan Polshaga evakuatsiya qilinayotgan o‘zbekistonliklar haqida ma’lumot berdi.
Qayd etilishicha, 27-fevral kuni Ukrainaning Lvov shahridan O‘zbekiston fuqarolaridan iborat navbatdagi guruh Ukraina—Polsha chegarasidagi “Krakoves—Karchova” nazorat-o‘tkazish punktiga yo‘lga chiqqan.
Bundan tashqari, O‘zbekistonning Ukrainadagi elchixonasi taqdim etgan ma’lumotga ko‘ra, shu vaqtgacha 600 dan ziyod O‘zbekiston fuqarosi Polsha chegarasiga yetkazilgan.
Elchixona vakillarining ma’lum qilishicha, O‘zbekiston fuqarolarini evakuatsiya qilish ishlari izchil davom etmoqda.
Tashqi ishlar vazirligi Ukraina—Polsha chegarasi tomon yo‘l olgan o‘zbekistonliklar aks etgan videolavhani ilova qilgan.
Eslatib o‘tamiz, O‘zbekiston Tashqi ishlar vazirligi Ukraina hududida 4300 ga yaqin O‘zbekiston fuqarosi borligini ma’lum qilgandi.
O‘zbekistonning Ukrainadagi elchixonasi xabariga ko‘ra, 26-fevral kuni Toshkent vaqti bilan soat 20:30 da 90 dan ziyod O‘zbekiston fuqarolaridan iborat birinchi evakuatsiya guruhi Lvovdan “Krakovets” nazorat-o‘tkazish punkti yo‘nalishi bo‘ylab yo‘lga chiqqan.
Keyinroq elchixona mamlakatdagi o‘zbekistonlik fuqarolarni evakuatsiya qilish ishlari haqida qo‘shimcha ma’lumot berdi. Unda aytilishicha, chegarani kesib o‘tish uzoq vaqt oladi, birinchi guruh uchun bu jarayon 14 soat davom etgan.
Elchixona, shuningdek, mamlakatni tark etish uchun Moldovaga ketmoqchi bo‘lgan fuqarolarga murojaat bilan chiqdi. Elchixona xavfsizlik tamoyilidan kelib chiqib, fuqarolar uchun Moldovaga borish osonroq bo‘lsa, ushbu variantni ko‘rib chiqishlari lozim ekanini bildirgan.
Izoh (0)