O‘zbekiston Tashqi ishlar vazirligi rasmiy vakili Ukrainadan evakuatsiya qilinayotgan o‘zbekistonliklar haqida qo‘shimcha ma’lumot berdi.
Qayd etilishicha, O‘zbekistonning Polshadagi elchixonasi tomonidan fuqarolarni Ukrainadan Polsha orqali vatanga qaytarish bo‘yicha tizimli ishlar amalga oshirilmoqda. Polsha hududida tashkil etilgan to‘planish joyida asosiy qismi yosh bolasi bor ayollardan iborat O‘zbekiston fuqarolari uchun sharoitlar yaratilgan. Xususan, ko‘rpa-to‘shak, tibbiy yordam, issiq ovqat berilgan.
27-fevral Toshkent vaqti bilan soat 16:00 ga qadar 110 ga yaqin O‘zbekiston fuqarosi “Karchova” nazorat-o‘tkazish punkti orqali Polsha hududiga kirgan. Yaqin vaqtda ichida boshqa fuqarolarning ham chegaradan o‘tishi kutilmoqda. Shundan so‘ng barcha o‘zbekistonliklar markazlashgan holda avtobuslarda Katovitse shahridagi aeroportga yetkaziladi.
O‘zbekistonlik diplomatlar “Karchova” nazorat-o‘tkazish punkti va Katovitse shahri aeroportida muntazam faoliyat yuritmoqda va fuqarolarning masalalarini hal qilmoqda. Evakuatsiya qilinayotgan barcha fuqarolar aeroportda barcha zarur mahsulotlar bilan ta’minlanadi.
Turli sabablarga ko‘ra yonida hujjatlari bo‘lmagan 30 nafar O‘zbekiston fuqarosiga qaytish guvohnomasi zudlik bilan rasmiylashtirib berilgan.
O‘zbekiston fuqarolarini Polshadan vatanga qaytarish maqsadida Uzbekistan Airways samolyotlarining o‘tishi uchun havo yo‘lagi bilan ta’minlash masalasi hal qilingan. Hozircha birinchi samolyotning O‘zbekistonga parvoz qilishi 28-fevral kuniga rejalashtirilmoqda.
Polsha Tashqi ishlar vazirligi O‘zbekiston elchixonasining murojaatidan so‘ng nihoyatda muhim qarorni qabul qilgan: vatanga qaytayotgan O‘zbekiston fuqarolari tomonidan hech qanday PZR-sertifikatlarini taqdim etish va Polshaga kirish vizasini rasmiylashtirish talab qilinmaydi.
Eslatib o‘tamiz, O‘zbekiston Tashqi ishlar vazirligi Ukraina hududida 4300 ga yaqin O‘zbekiston fuqarosi borligini ma’lum qilgandi.
O‘zbekistonning Ukrainadagi elchixonasi xabariga ko‘ra, 26-fevral kuni Toshkent vaqti bilan soat 20:30 da 90 dan ziyod O‘zbekiston fuqarolaridan iborat birinchi evakuatsiya guruhi Lvovdan “Krakovets” nazorat-o‘tkazish punkti yo‘nalishi bo‘ylab yo‘lga chiqqan.
Keyinroq elchixona mamlakatdagi o‘zbekistonlik fuqarolarni evakuatsiya qilish ishlari haqida qo‘shimcha ma’lumot berdi. Unda aytilishicha, chegarani kesib o‘tish uzoq vaqt oladi, birinchi guruh uchun bu jarayon 14 soat davom etgan.
Elchixona, shuningdek, mamlakatni tark etish uchun Moldovaga ketmoqchi bo‘lgan fuqarolarga murojaat bilan chiqdi. Elchixona xavfsizlik tamoyilidan kelib chiqib, fuqarolar uchun Moldovaga borish osonroq bo‘lsa, ushbu variantni ko‘rib chiqishlari lozim ekanini bildirgan.
Tashqi ishlar vazirligi bergan ma’lumotga ko‘ra, 27-fevral holati bo‘yicha 600 dan ziyod O‘zbekiston fuqarosi Polsha chegarasiga yetkazilgan. Fuqarolarini evakuatsiya qilish ishlari izchil davom etmoqda.
Izoh (0)