“Avvaliga qochdi, keyin o‘zi taslim bo‘ldi”. Marhum sportchi Kamoliddin Rasulov o‘limi bilan bog‘liq voqeani o‘rganayotgan sudda IIB xodimlari ko‘rsatma berdi

Marhum sportchi, 2012-yilda o‘tkazilgan sambo bo‘yicha o‘smirlar o‘rtasidagi jahon chempionati g‘olibi Kamoliddin Rasulov o‘limi yuzasidan 2022-yilning 8-fevral kuni boshlangan sud majlisi 25-fevral kuni o‘z ishini davom ettirdi, deya xabar berdi “Daryo” muxbiri.

Navbatdagi sud majlisida qotillik sodir etilgan kuni voqea joyiga kelgan IIB xodimlari — Doniyor Raimov hamda Murod Sodiqov guvohlik berdi.

Sudda dastlab Uchtepa tuman IIB post-patrul xizmati xodimi Doniyor Raimov so‘z olib, unga va sherigi Murod Sodiqovga 14- va 15-dahalar biriktirilganini, qotillik voqeasi 14-daha hududida sodir bo‘lganini bildirdi.

“Men va sherigim 14-dahadan chiqib kelayotganimizda chamasi 20 nafar kishi yig‘ilib turgan ekan. Odamlardan pichoqladi, degan gaplar eshitildi. Shunda sherigim qochayotgan odamni quvlab ketdi. Men esa ratsiya orqali boshqalarga xabar berib, so‘ngra mashinada sherigim ortidan yurdim. Sudlanuvchi esa ‘dom’ga qarab qochdi. So‘ngra podyezdga kirib ketdi. Birozdan so‘ng esa o‘zi chiqib, taslim bo‘ldi. Biz esa uni olib ketdik”, — dedi PPX xodimi Doniyor Raimov.

Doniyor Raimov ayblanuvchini qo‘lga olib, voqea joyiga qaytishganida marhum olib ketilganini bildirmoqda.

“Biz ayblanuvchini qo‘lga olib, voqea joyiga qaytganimizda marhumni olib ketishgan ekan”, — dedi PPX xodimi.

Sudda so‘z olgan yana bir PPX xodimi Murod Sodiqov ayblanuvchi voqea joyidan qochgach, uni quvlaganini aytmoqda.

“Voqea joyiga yetib kelganimizda to‘plangan odamlar orasidagi kishilardan biri bizni ko‘rib qochdi. Shunda men uni quvladim. U bizdan qochib, ‘dom’lardan birining podyezdiga kirib ketdi va eshikni yopdi. To‘g‘risi, avvalo shaxsiy xavfsizlik bo‘lgani bois odam pichoqlagan kishining ortidan kirmadim. Shunda uning o‘zi qochish niyati yo‘qligini aytib, oldimizga chiqib keldi. Biz esa uning qo‘lida pichoq yo‘qligiga ishonch hosil qilgach, uni olib ketdik”, — deydi PPX xodimi Murod Sodiqov.

IIB xodimlarining qo‘shimcha qilishicha, ular aybdorni qo‘lga olgach, marhumni jarohatlagan pichog‘i qayerda ekanini so‘ragan. U esa pichoqni voqea joyidagi “lotok”ka tashlab yuborganini bildirgan.

Eslatib o‘tamiz, mazkur sud majlisining 2022-yil 18-fevraldagi muhokamasida so‘z olgan marhumning xotini Gulnoza Xolmurodova marhum eri pichoqlangach, jon talvasasida qochganini, ammo atrofdagilar yordam bermaganini aytib, “kimdir yordam berarmikan deb, yig‘lab yordamga chaqirdim, ammo hech kim kelmadi, hatto PPX xodimlari ham qarab turishgandi. Ishonyapsizmi, hech kim yordam bermadi. Ayblanuvchining akasi voqea joyiga kelib, Kamoliddin akamning qo‘lidan ushlaganini, yordam bermoqchi ekani bilan izohlayapti. Ammo nega Kamoliddin akam pichoqlanib, bekatda qonga belanib yotganida yordamga kelmadi”, degandi.

Sambo bo‘yicha jahon chempioni 29 yoshli Kamoliddin Rasulov 2021-yilning 13-sentabr kuni soat 21:30 da Toshkent shahrining Uchtepa tumanidagi ko‘p qavatli uylar oldida boshqa bir sportchi tomonidan pichoqlab o‘ldirilgandi. Bosh prokuratura axborot xizmatining rasmiy ma’lumotida chempion yigitning pichoqlanishiga uning gumonlanuvchi tanishiga “Humo Trop” vitaminini tavsiya qilgani, oqibatda esa gumonlanuvchining sog‘lig‘i yomonlashgani, shifokorlar bu kasallikning davosi yo‘qligini bildirgani xabar berilgandi.

Jinoyat ishlari bo‘yicha Uchtepa tuman sudida so‘z olgan guvoh ham tanishi, sudda ayblanuvchi sifatida ishtirok etayotgan Sh.T. marhum Kamoliddin Rasulov tavsiya qilgan vitaminni aytilgan miqdordan ko‘ra ko‘proq iste’mol qilgani sabab sog‘lig‘i yomonlashganini, kechalari issig‘i chiqib, uxlolmaydigan bo‘lib qolganini aytdi. Voqea sodir bo‘lgan kuni pichoqdan jarohatlangan sportchini ikki kishi quvlab ketayotganini jamoatchilikka oshkor qilgan “Markaziy studiya” ko‘rsatuvi muxbiriga intervyu bergan noma’lum suhbatdosh esa vitaminni qabul qilgan sportchiga shifokorlar endi o‘lasan, deb aytishganini, sportchi shu sabab men o‘lsam, uyam o‘ladi, deya marhumni pichoqlaganini aytgandi.

Sudda, shuningdek, voqea sodir bo‘lgan joyda kuzatuv kamerasiga tushib qolgan ayol ham tinglandi. U sudga videotasvirda ko‘rinib qolgani sabab tergov va sudga kelishga majbur bo‘layotganini, ammo tayinli ma’lumotga ega emasligini bildirdi.