O‘zbekistonda 2021-yilda oliy va professional ta’lim muassasalarida 16,4 mlrd so‘mlik moliyaviy xatoliklar aniqlandi

AOKAda o‘tkazilgan brifingda Oliy va o‘rta maxsus ta’lim vazirligi boshqarma boshlig‘i Salohiddin Toshmatov ichki audit xizmati faoliyatining yillik natijalari sarhisobini ma’lum qildi.

Qayd etilishicha, ichki audit xizmatlari tomonidan tizimdagi 479 ta ta’lim muassasasi, jumladan, 56 ta oliy ta’lim hamda 423 ta kasb-hunar va o‘rta maxsus ta’lim muassasalarida moliyaviy faoliyatga doir monitoring va profilaktika tadbirlari o‘tkazilgan. Natijada

• 49 ta oliy ta’lim muassasalarida 9,4 milliard so‘mlik,
• 253 ta professional ta’lim muassasalarida 7 milliard so‘mlik moliyaviy xato va kamchiliklarga yo‘l qo‘yilgani aniqlangan.

2 ta oliy ta’lim hamda 10 ta kasbiy ta’lim muassasalarida o‘tkazilgan profilaktika tadbirlarida aniqlangan 2,7 milliard so‘mlik moliyaviy xato va kamchiliklarda jinoyat alomatlari mavjudligi sababli o‘rganish materiallari rasmiylashtirilib, huquqiy baho berish va qonuniy chora ko‘rish uchun huquqni muhofaza etuvchi organlarga yuborilgan.

Yuqorida aytib o‘tilgan moliyaviy qonunbuzilishlarga yo‘l qo‘ygan rahbar va mas’ul xodimlarning 161 nafariga nisbatan intizomiy jazo qo‘llanilgan. 46 nafari esa egallab turgan lavozimidan ozod etilgan.