Namanganda o‘g‘lining mashinasini jarima maydonidan chiqarib berish uchun YPX xodimiga 1 mln so‘m pora bergan erkak ushlandi

Namangan viloyati To‘raqo‘rg‘on tumanida qoida buzgan o‘g‘lining mashinasini jarima maydonidan olib chiqib, bayonnomani yo‘q qilish berish uchun yo‘l-patrul xizmati xodimiga pora bergan ota qo‘lga olindi. Bu haqda viloyat Ichki ishlar boshqarmasi xabar qildi.

Qayd etilishicha, 22-fevral kuni yo‘l-patrul xizmati inspektori shaxsiy xavfsizlik viloyati boshqarmasi boshlig‘i nomiga bildirgi bilan murojaat qilgan. U shu kuni To‘raqo‘rg‘on tumani hududida xizmat olib borayotgan vaqtida “Chust ko‘prik” MFY hududida 2003-yilda tug‘ilgan haydovchi boshqaruvidagi “ZIL-131” yuk avtomashinasini to‘xtatganini ma’lum qilgan. Xodim tegishli hujjatlarni taqdim etishni so‘raganida haydovchi transport vositasini boshqarish huquqini beruvchi hujjatlarsiz boshqargani aniqlangan. Unga nisbatan ma’muriy bayonnoma rasmiylashtirilib, avtomashina vaqtinchalik jarima maydoniga olib kirilgan.

Haydovchining otasi avtomashinani jarima maydonidan chiqarib berish va tuzilgan ma’muriy bayonnomani yo‘q qilib berishni so‘rab, evaziga 1 million so‘m taklif qilgan. YPX inspektor ushbu fuqaroga nisbatan qonuniy chora ko‘rishni so‘ragan.

Inspektorning bildirgisiga asosan shu kuni mas’ul xodimlari va prokuratura departamenti tuman bo‘limi xodimlari bilan hamkorlikda tezkor tadbir o‘tkazilgan. Namangan shahrida yashovchi haydovchining otasi (1979-yilda tug‘ilgan) To‘raqo‘rg‘on tumanidagi avtomobillarni vaqtincha saqlash jarima maydoni hududida inspektorga 1 million so‘m pullarni bergan vaqtida ushlangan.

Holat bo‘yicha Jinoyat kodeksining 211-moddasi (pora berish) 1-qismi bilan jinoyat ishi qo‘zg‘atilgan.