Qarshi tumanida joylashgan “Yangi hayot” MFYda 10 tup ko‘p yillik daraxtlar qo‘porib tashlangani aniqlandi. Bu haqda Qashqadaryo viloyati Ekologiya boshqarmasi xabar berdi.
Ma’lum qilinishicha, viloyati Ekologiya boshqarmasiga Qarshi tumanida daraxt kesilayotgani yuzasidan kelib tushgan murojaat inspektorlar tomonidan o‘rganilgan. O‘rganish davomida Qarshi tumani “Yangi hayot” MFY hududidan ariq qazish maqsadida ko‘p yillik daraxtlar Hyundai rusumli buldozerda qo‘porib tashlayotgani aniqlangan. Kesilgan daraxtlar xatlovdan o‘tkazilganda 4 tup aylant va 6 tup tut, jami 10 tup daraxt tag qismidan qo‘porib tashlangani ma’lum bo‘lgan.
Huquqbuzarlarga nisbatan Ma’muriy javobgarlik to‘g‘risidagi kodeksning 79-moddasi (daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish) 1-qismi bilan ma’muriy bayonnoma rasmiylashtirilib, 1 million 350 ming so‘m jarima hamda 92 million so‘m tabiatga yetkazilgan zarar hisoblangan.
Inspektorlarning sa’y-harakati bilan “Yangi hayot” MFY hududida 1 dona tut, 1 dona aylant va 45 dona terak daraxtlari kesib tashlanishdan saqlab qolingan.
Avvalroq Andijonda 12 tup daraxt noqonuniy kesilgani yuzasidan jinoyat ishi qo‘zg‘atilgani, O‘zbekistonda daraxt kesishga moratoriy muddatsiz davrga uzaytirilishi, Yunusobodda qurilish rejalashtirilgan hududdagi 10 ta qarag‘ay arralab ketilgani bo‘yicha jinoyat ishi qo‘zg‘atilgani to‘g‘risida xabar berilgandi.
Izoh (0)