Toshkentda Yevropa Ittifoqi va Markaziy Osiyo davlatlarining maxsus vakillari Afg‘onistondagi vaziyatni muhokama qildi

23-fevral kuni Toshkent shahrida Yevropa Ittifoqi va Markaziy Osiyo mamlakatlarining Afg‘oniston bo‘yicha maxsus vakillari konferensiyasi bo‘lib o‘tdi. Bu haqda O‘zbekiston Tashqi ishlar vazirligi matbuot xizmati xabar berdi.

Tadbirda afg‘on inqirozini tinch yo‘l bilan hal etish, Afg‘onistonni mintaqaviy integratsiya jarayonlariga faol jalb etish, mamlakat iqtisodiyotini tiklash va uning hududida turli infratuzilma loyihalarini amalga oshirish bo‘yicha xalqaro hamda mintaqaviy sa’y-harakatlar muhokama qilingan.

O‘zbekiston prezidentining Afg‘oniston bo‘yicha maxsus vakili Ismatulla Irgashev o‘z nutqida mamlakatning Afg‘onistonga nisbatan yuritayotgan siyosati, uning asosiy jihatlari, jumladan, mamlakat yangi hukumati bilan konstruktiv muloqot o‘rnatish zarurligiga alohida to‘xtalib o‘tgan.

Uchrashuv ishtirokchilari Afg‘onistondagi og‘ir insonparvarlik vaziyatdan xavotirda ekanliklarini qayd etib, boshqa davlatlarni ham ushbu mamlakat xalqiga mazkur xayrli ishga qo‘l urishlariga chorlagan.

“Afg‘onistonning yangi rasmiylari keng vakillikka asoslangan hukumat tuzish bo‘yicha o‘z va’dalari va xalqaro majburiyatlarini bajarishi, ayollar va milliy ozchiliklar huquqlarini hurmat qilishi, shuningdek, mamlakat hududining xalqaro terrorchilar boshpanasiga aylanishining oldini olishi zarurligi ta’kidlandi”, — deyiladi xabarda.

Tadbirda ishtirok etgan maxsus vakillar prezidenti Shavkat Mirziyoyevning Termiz shahrida Afg‘onistonga insonparvarlik yordami yetkazib berish uchun Ko‘ptarmoqli transport-logistika xabini tashkil etish tashabbusini qo‘llab-quvvatlashini bildirgan.

Ushbu shakldagi muloqotni Afg‘oniston xalqini qo‘llab-quvvatlash bo‘yicha maslahatlashuvlar va hamkorlik platformasi sifatida muntazam ravishda davom ettirishga kelishib olingan. Tadbir yakuni bo‘yicha qo‘shma bayonot qabul qilingan.

Avvalroq Kobul shahrida O‘zbekiston va Afg‘oniston delegatsiyalarining kengaytirilgan yig‘ilishi bo‘lib o‘tgani to‘g‘risida xabar berilgandi. O‘zbekiston tomoniga bosh vazirning o‘rinbosari — investitsiyalar va tashqi savdo vaziri Sardor Umurzoqov, Afg‘oniston tomoniga esa muvaqqat hukumati rahbarining o‘rinbosari Abdulg‘ani Barodar boshchilik qilgan. Uchrashuvda afg‘on tomoni mamlakatda xavfsizlikni ta’minlash, iqtisodiyot va ijtimoiy sohani tiklash hamda korrupsiyaga qarshi kurashish borasida ko‘rilayotgan chora-tadbirlar haqida ma’lumot bergan.