Қарши туманида жойлашган «Янги ҳаёт» МФЙда 10 туп кўп йиллик дарахтлар қўпориб ташлангани аниқланди. Бу ҳақда Қашқадарё вилояти Экология бошқармаси хабар берди.
Маълум қилинишича, вилояти Экология бошқармасига Қарши туманида дарахт кесилаётгани юзасидан келиб тушган мурожаат инспекторлар томонидан ўрганилган. Ўрганиш давомида Қарши тумани «Янги ҳаёт» МФЙ ҳудудидан ариқ қазиш мақсадида кўп йиллик дарахтлар Hyundai русумли бульдозерда қўпориб ташлаётгани аниқланган. Кесилган дарахтлар хатловдан ўтказилганда 4 туп айлант ва 6 туп тут, жами 10 туп дарахт таг қисмидан қўпориб ташлангани маълум бўлган.
Ҳуқуқбузарларга нисбатан Маъмурий жавобгарлик тўғрисидаги кодекснинг 79-моддаси (дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) 1-қисми билан маъмурий баённома расмийлаштирилиб, 1 миллион 350 минг сўм жарима ҳамда 92 миллион сўм табиатга етказилган зарар ҳисобланган.
Инспекторларнинг саъй-ҳаракати билан «Янги ҳаёт» МФЙ ҳудудида 1 дона тут, 1 дона айлант ва 45 дона терак дарахтлари кесиб ташланишдан сақлаб қолинган.
Аввалроқ Андижонда 12 туп дарахт ноқонуний кесилгани юзасидан жиноят иши қўзғатилгани, Ўзбекистонда дарахт кесишга мораторий муддатсиз даврга узайтирилиши, Юнусободда қурилиш режалаштирилган ҳудуддаги 10 та қарағай арралаб кетилгани бўйича жиноят иши қўзғатилгани тўғрисида хабар берилганди.
Изоҳ (0)