Xorazmda me’moriy arxitektura yodgorligi hisoblanuvchi Deshon qal’aning bir qismi qulab tushgani aniqlandi

Madaniy meros agentligi Xorazm viloyati boshqarmasi mutaxassislari tomonidan olib borilgan monitoring natijasida xususiy xonadon ichida Deshon qal’a me’moriy arxitektura yodgorligi hisoblanuvchi devorning bir qismi qulab tushgani aniqlandi. Bu haqda agentlik matbuot xizmati xabar berdi.

Ma’lum qilinishicha, ushbu tarixiy obidani saqlab qolishga qaratilgan ishlarni amalga oshirishga to‘sqinlik qilgan fuqaro A.R.ga bir necha marotaba rasmiy ogohlantirish berilgan. “Uning vaziyatga bo‘lgan bepisandligi xonadonida joylashgan madaniy meros obyektiga zarar yetkazilishiga va qisman buzilishiga sabab bo‘ldi”, — deyiladi xabarda.

Ta’kidlanishicha, bu holatga asosiy sabab — fuqaro tomonidan uy uning shaxsiy mulki ekanligi vaj qilib ko‘rsatilib, agentlik mutasaddilariga qarshilik ko‘rsatgan holda ularni konservatsiya va restavratsiya qilishlariga yo‘l qo‘ymagani. Shunga qaramasdan agentlik mutaxassislari joyiga chiqqan holda tarixiy obyektni uzoqdan kuzatib, fuqaro bilan murosaga kelish choralarini ko‘rgan. Lekin fuqaro barcha takliflarga rad javobini bergan.

Shu sababli agentlik fuqaroga nisbatan tegishli huquqni muhofaza qiluvchi organlarga vaziyatga huquqiy baho berish va davlat muhofazasiga olingan obyektda asrashga doir ishlarni olib borishga to‘sqinlik qilgani uchun chora ko‘rish to‘g‘risidagi taqdimnoma kiritish jarayonini boshlangan.

“Bu kabi holatlar respublikamizning boshqa hududlarida ham afsuski kuzatilmoqda. Shularni inobatga olgan holda Vazirlar Mahkamasiga agentlik tomonidan mahalliy hokimiyatlarga madaniy meros obyektlari atrofida joylashgan shaxsiy mulklarni qonunchilikda belgilangan tartibda ko‘chirish bo‘yicha taklif kiritilishi to‘g‘risida ma’lum qilinadi”, — deya qayd etiladi xabarda.

Avvalroq YuNESKO Umumjahon merosi obyektlari ro‘yxatiga kirishi kutilayotgan “Chor Bakr” majmuidagi yer noqonuniy auksionga qo‘yilgani, Parkentda arxeologik yodgorlik hududi g‘isht ishlab chiqarish uchun sotib yuborilgani to‘g‘risida xabar berilgandi.