Qozog‘istondagi tartibsizliklar vaqtida 14 nafar o‘zbekistonlik qo‘lga olingani ma’lum bo‘ldi. Ular tergov izolyatorida saqlanmoqda

Qozog‘istonda yanvar oyida sodir bo‘lgan ommaviy tartibsizliklar oqibatida qo‘lga olingan 18 nafar xorijlik hamon hibsda qolmoqda. Ularning aksariyatini O‘zbekiston fuqarolari tashkil etadi. Bu haqda inson huquqlari bo‘yicha ombudsman Elvira Azimovaga tayanib, Tengrinews xabar berdi.

“Ayni vaqtda ommaviy tartibsizliklar sabab hibsga olingan va tergov izolyatorlarida 18 nafar xorij fuqarosi saqlanmoqda. Ularning 14 nafari — O‘zbekiston, ikki nafari — Rossiya, qolgan ikki nafari esa Qirg‘iziston fuqarosidir”, — deydi Azimova.

Shuningdek, ombudsman hibsga olingan fuqarolar saqlanayotgan yopiq muassasalar monitoringini ham e’lon qilgan.

“Qamoqda saqlash sharoitlariga kelsak, 6-yanvardan keyingi dastlabki 48 soat ichida ichimlik suvi va oziq-ovqatdan o‘z vaqtida foydalana olmaslik holatlari aniqlangan. Vaqtinchalik saqlash izolyatorlari va qo‘lga olinganlar yetkazilgan qo‘shimcha binolarda muammo hibsga olinganlarning ko‘pligi bilan bog‘liq bo‘lgan. Keyinchalik vaziyat barqarorlashgan. 10-yanvardan keyin hibsga olingan barchaga uylaridan jo‘natmalarni qabul qilishga ruxsat berilgan. Bugungi kunda ovqatlanish me’yorlariga rioya qilinmoqda, biroq ovqatlanish sifati bo‘yicha bir qancha murojaatlar bor”, — deya ta’kidlaydi Azimova.

Qozog‘istonda 2-yanvar kuni gaz narxi keskin oshishi sababli ommaviy norozilik namoyishlari boshlanib, bir necha kundan so‘ng ular tartibsizliklarga aylangandi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi.

Mamlakatdagi keskinlik munosabati bilan To‘qayev KXShT (Kollektiv xavfsizlik shartnomasi tashkiloti)ga murojaat qilib, yordam so‘radi. Tashkilot cheklangan muddatga respublikaga tinchlikparvar kontingent yubordi. Shuningdek, To‘qayev tartibsizliklar sabablarini o‘rganuvchi, aybdorlarni aniqlovchi va javobgarlikka tortuvchi tergov guruhini tuzishni buyurdi. Davlat rahbarining so‘zlariga ko‘ra, tartibsizliklar ishtirokchilari xorijda malaka oshirgan.

Qozog‘iston Ichki ishlar vazirligining xabar berishicha, maxsus operatsiyalar davomida 4000 nafarga yaqin terrorchi hibsga olingan,  26 nafar “qurolli jinoyatchi” o‘ldirilgan, yana 18 nafari yarador qilingan. Qozog‘iston Bosh prokuraturasi ommaviy tartibsizliklar, shuningdek, terrorchilik aktlarini sodir etish bo‘yicha tergov doirasida jinoiy ish qo‘zg‘atdi.