Buxoro va Qashqadaryo viloyatlarida fuqarolarni ishga kiritib qo‘yishni va’da qilib, ulardan pul undirmoqchi bo‘lgan shaxslar qo‘lga olindi. Bu haqda Bosh prokuratura huzuridagi departament xabar berdi.
Ma’lum qilinishicha, departamentning Buxoro shahar bo‘limi tomonidan DXXning viloyat boshqarmasi bilan tezkor tadbir o‘tkazilgan. Tadbirda O.U. ismli shaxs fuqaro Sh.ning ishonchiga kirib, uni go‘yoki yuqori lavozimda ishlovchi tanishlari yordamida iste’molchilar huquqlarini himoya qilish bo‘limiga ishga joylashtirib qo‘yishga va’da bergani aniqlangan. Buning evaziga u 1,5 ming dollar olgan vaqtida ashyoviy dalillar bilan ushlangan.
Shuningdek, departamentning Qashqadaryo viloyati boshqarmasi tomonidan DXX bilan hamkorlikda o‘tkazilgan tezkor tadbirda Z.X. ismli shaxs fuqaro I.ning ishonchiga kirib, uni O‘zbekiston Milliy gvardiyasi tizimiga ishga kiritib qo‘yish evaziga 4 ming dollar olgan vaqtida ashyoviy dalillar bilan qo‘lga olingan.
Mazkur holatlar yuzasidan Jinoyat kodeksining 168-moddasi (firibgarlik) 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Bundan oldin Samarqandda Milliy gvardiyaga ishga kiritib qo‘yishni va’da qilib, 27 ming dollarini o‘zlashtirgan fuqaroga jinoyat ishi qo‘zg‘atilgani, Buxoroda fuqaroni Milliy gvardiyaga ishga qo‘yish evaziga 2000 dollar olgan shaxslar ushlangani, Samarqandda harbiy oliygohlar va Temurbeklar maktabiga o‘qishga kiritishini aytib, fuqarolardan qariyb 10 500 dollar pul olgan ayol qo‘lga olingani to‘g‘risida xabar berilgandi.
Mavzuga doir:
- Namanganda shifoxonaga ishga kiritib qo‘yish uchun 700 dollar so‘ragan hamshira va mudir o‘rinbosari ushlandi
- Samarqandda “O‘zbekiston temir yo‘llari”ga ishga kiritib qo‘yish uchun 3 ming dollar pora olgan temiryo‘lchi ushlandi
- Buxoroda fuqaroni neft zavodiga ishga kiritib qo‘yish uchun 2 ming dollar olgan shaxs ushlandi
- Samarqandda ishga joylash uchun pora olgan maktab direktori va shifokor qo‘lga olindi
Izoh (0)