Qozog‘iston Milliy xavfsizlik qo‘mitasi (MXQ)ning sobiq raisi Karim Masimovga nisbatan davlatga xiyonat bo‘yicha sudga qadar tergov ishi davom etmoqda. Masimovdan tashqari qo‘mita raisining ikki sobiq o‘rinbosari ham hibsga olingan, deyiladi Asia-Plus xabarida.

Karim Masimov

Foto: Yandex

Mazkur ish doirasida hokimiyatni zo‘rlik bilan egallab olish va mansab vakolatlarini suiiste’mol qilishga qaratilgan harakatlar yuzasidan sudga qadar qo‘shimcha tekshiruvlar o‘tkazilmoqda.

“Ushbu jinoyatlarni sodir etganlikda gumon qilinib, Karim Masimovdan tashqari, MXQ raisining sobiq o‘rinbosari — ‘A’ maxsus xizmati boshlig‘i Anuar Sadiqulov va qo‘mita raisining o‘rinbosari Daulet Yergojin hibsga olingan”, — deyiladi xabarda.

Hozirda tergov davom etmoqda.

8-yanvar kuni MXQ sobiq raisi Karim Masimov hibsga olingani haqida xabar berilgandi. 6-yanvar kuni Masimov qo‘mita raisi lavozimidan ozod etilgan. Ermek Sagimbayev MXQning yangi rahbari bo‘lgan.

MXQ rasmiy saytidagi xabarga ko‘ra, Qozog‘iston Milliy xavfsizlik qo‘mitasi raisining birinchi o‘rinbosari, sobiq prezident Nursulton Nazarboyevning jiyani, general-leytenant Samat Abish yillik ta’tilga chiqqan.

“Kiritilayotgan so‘rovlar yuzasidan shuni ma’lum qilamizki, MXQ raisining birinchi o‘rinbosari S.Abish o‘z lavozimida faoliyat yuritishda davom etmoqda, ayni paytda u yillik ta’tilda”, — deyiladi xabarda.

Qozog‘istonda 2-yanvar kuni gaz narxi keskin oshishi sababli ommaviy norozilik namoyishlari boshlanib, bir necha kundan so‘ng ular tartibsizliklarga aylandi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi. Qozog‘istondagi tartibsizliklar fonida mamlakat bo‘ylab favqulodda holat e’lon qilingan. 6-yanvarda Kollektiv Xavfsizlik Shartnomasi Tashkiloti (KXShT) tinchlikparvar kuchlari Qozog‘istonga jo‘natdi. 7-yanvarda mamlakat prezidenti Qosim-Jo‘mart To‘qayev Qozog‘istonda konstitutsiyaviy tartib tiklanganini e’lon qildi va mamlakat bo‘ylab terrorchilik xavfining yuqori darajasi joriy etildi.

Qozog‘iston Bosh prokuraturasi Olmaotadagi tartibsizliklar va hujumlardan so‘ng 494 ta jinoiy ish qo‘zg‘atdi. Idora ma’lumotlariga ko‘ra, favqulodda holat tartibida sodir etilgan huquqbuzarliklar uchun ma’muriy ish qo‘zg‘atish to‘g‘risida 6966 ta bayonnoma tuzilgan.

4918 nafar shaxs turli turdagi ma’muriy javobgarlikka tortildi, shu jumladan, 1978 nafar shaxs hibsga olindi. 791 nafar shaxs jarimaga tortildi, 2149 nafari ogohlantirildi. Sudlar tomonidan 2048 ta material ko‘rib chiqilmoqda.

Bugungi kunda tergov-tezkor guruhlar tomonidan 494 ta jinoiy ish, jumladan, terrorchilik harakatlari bo‘yicha 44 ta, ommaviy tartibsizliklar bo‘yicha 34 ta, qotillik holatlari bo‘yicha 15 ta va boshqa jinoiy ishlar bo‘yicha tergov harakatlari olib borilmoqda

Jinoyat sodir etganlikda gumon qilingan 524 nafar shaxs vaqtinchalik saqlash hibsxonasiga joylashtirilgan. Sud sanksiyasi bilan 412 nafar shaxs qamoqqa olingan. Hozirda kerakli tergov harakatlari olib borilmoqda.