Қозоғистондаги тартибсизликлар вақтида 14 нафар ўзбекистонлик қўлга олингани маълум бўлди. Улар тергов изоляторида сақланмоқда

Қозоғистонда январь ойида содир бўлган оммавий тартибсизликлар оқибатида қўлга олинган 18 нафар хорижлик ҳамон ҳибсда қолмоқда. Уларнинг аксариятини Ўзбекистон фуқаролари ташкил этади. Бу ҳақда инсон ҳуқуқлари бўйича омбудсман Элвира Азимовага таяниб, Tengrinews хабар берди.

«Айни вақтда оммавий тартибсизликлар сабаб ҳибсга олинган ва тергов изоляторларида 18 нафар хориж фуқароси сақланмоқда. Уларнинг 14 нафари — Ўзбекистон, икки нафари — Россия, қолган икки нафари эса Қирғизистон фуқаросидир», — дейди Азимова.

Шунингдек, омбудсман ҳибсга олинган фуқаролар сақланаётган ёпиқ муассасалар мониторингини ҳам эълон қилган.

«Қамоқда сақлаш шароитларига келсак, 6 январдан кейинги дастлабки 48 соат ичида ичимлик суви ва озиқ-овқатдан ўз вақтида фойдалана олмаслик ҳолатлари аниқланган. Вақтинчалик сақлаш изоляторлари ва қўлга олинганлар етказилган қўшимча биноларда муаммо ҳибсга олинганларнинг кўплиги билан боғлиқ бўлган. Кейинчалик вазият барқарорлашган. 10 январдан кейин ҳибсга олинган барчага уйларидан жўнатмаларни қабул қилишга рухсат берилган. Бугунги кунда овқатланиш меъёрларига риоя қилинмоқда, бироқ овқатланиш сифати бўйича бир қанча мурожаатлар бор», — дея таъкидлайди Азимова.

Қозоғистонда 2 январь куни газ нархи кескин ошиши сабабли оммавий норозилик намойишлари бошланиб, бир неча кундан сўнг улар тартибсизликларга айланганди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди.

Мамлакатдаги кескинлик муносабати билан Тўқаев КХШТ (Коллектив хавфсизлик шартномаси ташкилоти)га мурожаат қилиб, ёрдам сўради. Ташкилот чекланган муддатга республикага тинчликпарвар контингент юборди. Шунингдек, Тўқаев тартибсизликлар сабабларини ўрганувчи, айбдорларни аниқловчи ва жавобгарликка тортувчи тергов гуруҳини тузишни буюрди. Давлат раҳбарининг сўзларига кўра, тартибсизликлар иштирокчилари хорижда малака оширган.

Қозоғистон Ички ишлар вазирлигининг хабар беришича, махсус операциялар давомида 4000 нафарга яқин террорчи ҳибсга олинган,  26 нафар «қуролли жиноятчи» ўлдирилган, яна 18 нафари ярадор қилинган. Қозоғистон Бош прокуратураси оммавий тартибсизликлар, шунингдек, террорчилик актларини содир этиш бўйича тергов доирасида жиноий иш қўзғатди.