Ekologiya va atrof-muhitni muhofaza qilish davlat qo‘mitasida Global yashil o‘sish institutining (GGGI) O‘zbekistondagi vakolatxonasining rasmiy ochilishiga bag‘ishlangan tadbir bo‘lib o‘tdi. Bu haqda qo‘mita matbuot xizmati xabar qildi.
Qayd etilishicha, tadbirda Global yashil o‘sish instituti bosh direktor o‘rinbosari Xelena Makloid, institutning Osiyo bo‘yicha mintaqaviy direktori Achala Abeysingx, shuningdek, BMT Taraqqiyot dasturi, YEXHT va boshqa xalqaro tashkilotlar, diplomatik korpus, vazirliklar, idoralar va OAV vakillari ishtirok etgan.
Tadbir Global yashil o‘sish instituti assambleyasi prezidenti Pan Gi Munning ishtirokchilarga videomurojaati bilan boshlangan.
Ma’lumot uchun, Global yashil o‘sish instituti xalqaro hukumatlararo tashkilot. Bosh ofisi Seul shahrida (Janubiy Koreya) joylashgan. Mazkur tashkilot 2012-yil 20-iyun kuni Rio-de-Janeyroda (Braziliya) BMTning Barqaror rivojlanish bo‘yicha konferensiyasi doirasida ta’sis etilgan. Hozirgi kunda institut dunyoning 30 dan ortiq mamlakatida 54 ta loyihani amalga oshirib kelmoqda. Institut prezidenti va kengash raisi BMTning sobiq bosh kotibi Pan Gi Mun hisoblanadi.
Tashkilotning maqsadi iqlim o‘zgarishi sharoitlarida taraqqiy etgan hamda bozor iqtisodiyotini tanlagan mamlakatlarda yashil iqtisodiyotni rivojlantirish yo‘li orqali barqaror iqtisodiy o‘sishga ko‘maklashish hisoblanadi.
2022-yilda Davlat ekologiya qo‘mitasi hamda institut Orol dengizi tanazzuli salbiy oqibatlarini bartaraf etish maqsadida Orolbo‘yi mintaqasining yashil tiklanishini moliyalashtirishga yo‘naltirilgan hamkorlikdagi loyihani amalga oshirishni boshlagan. Loyihaning umumiy qiymati 5,65 million dollarga teng.
Loyiha Xalqaro hamkorlik bo‘yicha Koreya agentligi (KOICA) tomonidan moliyalashtiriladi. Loyihaning maqsadi Orol dengizi tanazzuli oqibatlarini bartaraf etish uchun Qoraqalpog‘istonning yashil reabilitatsiyasiga ko‘maklashish, shuningdek, barqaror hayotiy ta’minot hamda tabiiy xavflarga barqarorlikni ta’minlash bo‘yicha chora-tadbirlarni belgilash hisoblanadi.
Global yashil o‘sish instituti MDH, shu jumladan, Markaziy Osiyo mamlakatlari orasida birinchi ofis hisoblanadi.
Tadbir davomida Global yashil o‘sish instituti hamda Barqaror rivojlanish bo‘yicha Davlatlararo komissiyasi o‘rtasida Orol dengizi havzasi uchun muhim hisoblangan yashil o‘sish va iqlim o‘zgarishi sohasida hamkorlik bo‘yicha o‘zaro anglashuv memorandumi imzolangan.
Shavkat Mirziyoyev 2021-yilning 30-may kuni Janubiy Koreya prezidenti Mun Chje Inning taklifiga binoan Seul shahrida videoanjuman shaklida o‘tayotgan “Yashil o‘sish va global maqsadlar uchun hamkorlik – 2030” ikkinchi xalqaro sammiti ishida ishtirok etgandi.
Eslatib o‘tamiz, 2021-yilning 29-iyul—2-avgust kunlari tashqi ishlar vaziri Abdulaziz Komilov boshchiligidagi delegatsiya amaliy tashrif bilan Janubiy Koreyada bo‘lishi xabar qilingandi. Tashrif dasturida Tashqi ishlar vazirligi, parlament, Koreya xalqaro hamkorlik agentligi (KOICA), Yashil o‘sish global instituti (GGGI) va Janubiy Koreyaning boshqa idoralarida uchrashuvlar va muzokaralar, shuningdek, Inchhon shahridagi Koreya—O‘zbekiston biznes markazi faoliyati bilan tanishish ko‘zda tutilgandi.
Izoh (0)