Экология ва атроф-муҳитни муҳофаза қилиш давлат қўмитасида Глобал яшил ўсиш институтининг (GGGI) Ўзбекистондаги ваколатхонасининг расмий очилишига бағишланган тадбир бўлиб ўтди. Бу ҳақда қўмита матбуот хизмати хабар қилди.
Қайд этилишича, тадбирда Глобал яшил ўсиш институти бош директор ўринбосари Хелена Маклоид, институтнинг Осиё бўйича минтақавий директори Ачала Абейсингх, шунингдек, БМТ Тараққиёт дастури, ЕХҲТ ва бошқа халқаро ташкилотлар, дипломатик корпус, вазирликлар, идоралар ва ОАВ вакиллари иштирок этган.
Тадбир Глобал яшил ўсиш институти ассамблеяси президенти Пан Ги Муннинг иштирокчиларга видеомурожаати билан бошланган.
Маълумот учун, Глобал яшил ўсиш институти халқаро ҳукуматлараро ташкилот. Бош офиси Сеул шаҳрида (Жанубий Корея) жойлашган. Мазкур ташкилот 2012 йил 20 июнь куни Рио-де-Жанейрода (Бразилия) БМТнинг Барқарор ривожланиш бўйича конференцияси доирасида таъсис этилган. Ҳозирги кунда институт дунёнинг 30 дан ортиқ мамлакатида 54 та лойиҳани амалга ошириб келмоқда. Институт президенти ва кенгаш раиси БМТнинг собиқ бош котиби Пан Ги Мун ҳисобланади.
Ташкилотнинг мақсади иқлим ўзгариши шароитларида тараққий этган ҳамда бозор иқтисодиётини танлаган мамлакатларда яшил иқтисодиётни ривожлантириш йўли орқали барқарор иқтисодий ўсишга кўмаклашиш ҳисобланади.
2022 йилда Давлат экология қўмитаси ҳамда институт Орол денгизи таназзули салбий оқибатларини бартараф этиш мақсадида Оролбўйи минтақасининг яшил тикланишини молиялаштиришга йўналтирилган ҳамкорликдаги лойиҳани амалга оширишни бошлаган. Лойиҳанинг умумий қиймати 5,65 миллион долларга тенг.
Лойиҳа Халқаро ҳамкорлик бўйича Корея агентлиги (KОICА) томонидан молиялаштирилади. Лойиҳанинг мақсади Орол денгизи таназзули оқибатларини бартараф этиш учун Қорақалпоғистоннинг яшил реабилитациясига кўмаклашиш, шунингдек, барқарор ҳаётий таъминот ҳамда табиий хавфларга барқарорликни таъминлаш бўйича чора-тадбирларни белгилаш ҳисобланади.
Глобал яшил ўсиш институти МДҲ, шу жумладан, Марказий Осиё мамлакатлари орасида биринчи офис ҳисобланади.
Тадбир давомида Глобал яшил ўсиш институти ҳамда Барқарор ривожланиш бўйича Давлатлараро комиссияси ўртасида Орол денгизи ҳавзаси учун муҳим ҳисобланган яшил ўсиш ва иқлим ўзгариши соҳасида ҳамкорлик бўйича ўзаро англашув меморандуми имзоланган.
Шавкат Мирзиёев 2021 йилнинг 30 май куни Жанубий Корея президенти Мун Чже Иннинг таклифига биноан Сеул шаҳрида видеоанжуман шаклида ўтаётган «Яшил ўсиш ва глобал мақсадлар учун ҳамкорлик – 2030» иккинчи халқаро саммити ишида иштирок этганди.
Эслатиб ўтамиз, 2021 йилнинг 29 июль—2 август кунлари ташқи ишлар вазири Абдулазиз Комилов бошчилигидаги делегация амалий ташриф билан Жанубий Кореяда бўлиши хабар қилинганди. Ташриф дастурида Ташқи ишлар вазирлиги, парламент, Корея халқаро ҳамкорлик агентлиги (КОICА), Яшил ўсиш глобал институти (GGGI) ва Жанубий Кореянинг бошқа идораларида учрашувлар ва музокаралар, шунингдек, Инчҳон шаҳридаги Корея—Ўзбекистон бизнес маркази фаолияти билан танишиш кўзда тутилганди.
Изоҳ (0)