Oliy Majlis Qonunchilik palatasi migrantlarga oid yangi qonunni qabul qildi

Oliy Majlis Qonunchilik palatasining 22-fevral kuni bo‘lib o‘tgan majlisida “Tashqi mehnat migratsiyasi to‘g‘risida”gi qonun uchinchi o‘qishda ko‘rib chiqildi. Bu haqda parlament quyi palatasi matbuot xizmati xabar berdi.

Qonun loyihasida tashqi mehnat migratsiyasi sohasidagi davlat siyosatining asosiy yo‘nalishlari belgilangan. Sohada qo‘llanib kelinayotgan tushunchalarning mazmun-mohiyati ochib berilgan.

Shuningdek, loyihada nazarda tutilayotgan normalar bilan uyushgan holda ishga joylashtiriladigan fuqarolarni ijtimoiy qo‘llab-quvvatlash, O‘zbekistondan tashqarida vaqtinchalik mehnat faoliyatini amalga oshirayotgan fuqarolarning huquqlari va qonuniy manfaatlarini himoya qilish, mehnat migratsiyasidan qaytib kelgan fuqarolarni reintegratsiya qilish tartibi tizimlashtiriladi. Bundan tashqari, qonun loyihasida ko‘zda tutilayotgan normalar bilan mehnat migrantlariga muayyan imtiyoz va preferensiyalar taqdim etilmoqda.

Deputatlar qonun loyihasining ahamiyatini, ikkinchi o‘qishda bildirilgan taklif-tavsiyalarning loyihada aks ettirilganini alohida ta’kidlab, uni uchinchi o‘qishda qabul qilgan.

Eslatib o‘tamiz, 2021-yilning oktabrida “Milliy tiklanish” demokratik partiyasidan prezidentlikka nomzod Alisher Qodirov Andijon viloyatidagi saylovchilar bilan bo‘lib o‘tgan uchrashuvda migrantlardan ham soliq undirish taklifini bildirgandi. Uning so‘zlariga ko‘ra, migrantlar ham O‘zbekiston taraqqiyoti uchun soliq to‘lashi kerak. Keyinroq Shavkat Mirziyoyev Toshkent viloyatida saylovchilar bilan uchrashuvda Alisher Qodirovning fikrlariga munosabat bildirib, “Migrantlar — mening fidoyi farzandlarim”, degandi.

Dekabr oyida esa O‘zbekistonda mehnat migrantlarining daromadini ikki tomonlama soliqqa tortmaslik belgilanayotgani ma’lum bo‘ldi. “Mazkur mazmundagi qonunni qabul qilish bir qator siyosiy partiyalar, shu jumladan, O‘zLiDePning saylovoldi platformasida ham belgilangan edi. E’tiborli jihati shundaki, qonun loyihasida hukumat va vakolatli davlat organlariga mehnat migrantlari va ularning oila a’zolarini ijtimoiy qo‘llab-quvvatlash, sharoitlarini yaxshilash borasida choralar ko‘rish vazifasi yuklatilmoqda”, — deb yozgandi o‘shanda deputat Rasul Kusherbayev.