Firdavs Abduxoliqovga manfaatlar to‘qnashuvi yuzasidan qo‘zg‘atilgan ma’muriy ish bo‘yicha sud qarori o‘qildi

Jinoyat ishlari bo‘yicha Chilonzor tuman sudida 21-fevral kuni Kinematografiya agentligi bosh direktori Firdavs Abduxoliqovga oid ma’muriy huquqbuzarlik to‘g‘risidagi ishni ko‘rib chiqish bo‘yicha sud jarayoni nihoyasiga yetib, sud qarori e’lon qilindi. Bu haqda Toshkent shahar sudlari xabar qildi.

Sud qaroriga ko‘ra, Abduxoliqov Ma’muriy javobgarlik to‘g‘risidagi kodeksning 175-8-moddasi (davlat xaridlari to‘g‘risidagi qonunchilikni buzish) 4-qismida nazarda tutilgan ma’muriy huquqbuzarlikni sodir etgan deb topilib, unga bazaviy hisoblash miqdorining 30 baravari miqdorida jarima jazosi tayinlangan.

Ushbu qaror ustidan Ma’muriy javobgarlik to‘g‘risidagi kodeksda belgilangan tartib va muddatda apellyatsiya shikoyati yoki protest berish mumkinligi ma’lum qilindi.

Eslatib o‘tamiz, Korrupsiyaga qarshi kurashish agentligi Kinematografiya agentligi rahbari Firdavs Abduxoliqov atrofidagi manfaatlar to‘qnashuvi yuzasidan o‘rganish olib borib, “Sevimli” telekanali bilan manfaatlar to‘qnashuvi borligi tasdiqlangandi.

25-yanvar kuni unga nisbatan Ma’muriy javobgarlik to‘g‘risidagi kodeksning 175-8-moddasi (davlat xaridlari to‘g‘risidagi qonunchilikni buzish) 4-qismi bilan ma’muriy huquqbuzarlik to‘g‘risidagi ish qo‘zg‘atilib, mazmunan ko‘rib chiqishlik uchun sudga yuborilgandi.

Ushbu ish mazmunan ko‘rib chiqish uchun jinoyat ishlari bo‘yicha Chilonzor tuman sudining ish yurituviga 26-yanvar kuni kelib tushgan va ishni sud majlisida ko‘rish uchun 27-yanvarga tayinlangan. 27-yanvarda bo‘lib o‘tgan sud majlisida Firdavs Abduxoliqov ishtirok etib, ko‘rsatma berdi.

Sud ishni ko‘rish bo‘yicha 31-yanvarga qadar tanaffus e’lon qildi. Shu kuni Firdavs Abduxoliqov sudga ariza bilan murojaat qilib, ishni ko‘rishni boshqa kunga qoldirishni so‘radi. Shundan so‘ng sudning keyingi ochiq majlisi 4-fevral kuni soat 10:00 da o‘tkazilishi belgilandi.

Keyinroq uning advokati Abduxoliqovning sog‘lig‘i yomonlashgani sababli ishni ko‘rib chiqishni boshqa kunga qoldirishni so‘radi. Sud uning talabini qanoatlantirgan.

Ma’lumot uchun, yuqoridagi modda bilan aybdor deb topilgan mansabdor shaxs bazaviy hisoblash miqdorining 20 baravaridan 30 baravarigacha (2022-yil 4-fevral holatiga ko‘ra: 5,4 million so‘mdan 8,1 million so‘mgacha) miqdorda jarima solishga sabab bo‘ladi.