Rossiyada balandlikdan yiqilib, boshidan og‘ir jarohat olgan o‘zbekistonlik vatanga qaytarildi (video)

Rossiyada og‘ir ahvolda qolgan bemor fuqaro O‘zbekistonga qaytarildi. Bu haqda Tashqi mehnat migratsiyasi agentligi xabar qildi.

Qayd etilishicha, farg‘onalik X.N. 2020-yil yanvar oyida ishlash uchun Rossiyaga borgan. 2021-yilning noyabrida baxtsiz hodisa oqibatida balandlikdan yiqilib, bosh qismidan og‘ir tan jarohati olgan.

U ancha muddat Rossiyada davolangan. Mablag‘siz, iqtisodiy qiyin ahvolda qolgan X.N. oilasi bag‘riga qaytgan. Unga shifokor nazorati ostida vatanga qaytishida amaliy yordam ko‘rsatilgan.

X.N. Toshkent xalqaro aeroportida agentlik mas’ul xodimlari va fuqaroning yaqin qarindoshlari tomonidan kutib olingan. Tez tibbiy yordam mashinasida Respublika shoshilinch tez tibbiy yordam ilmiy markaziga kuzatilgan.