«Туризм, маданий мерос ва спорт соҳаларида давлат бошқарувини такомиллаштиришга доир ташкилий чора-тадбирлар тўғрисида»ги президент фармони қабул қилинди. Ҳужжат матни ЎзАда эълон қилинди.
Қайд этилишича, фармонга биноан янги ёндашувлар асосида туризм ва спорт соҳаларидаги бошқарув сифати янада оширилади. Бунинг учун Туризм ва спорт вазирлиги негизида Туризм ва маданий мерос вазирлиги, Спортни ривожлантириш вазирлиги ташкил этилиши ҳамда бу вазирликларнинг йўналишлари белгиланди.
Шунингдек, эндиликда бош вазир ўринбосари – туризм ва спорт вазири лавозими бош вазир ўринбосари – туризм ва маданий мерос вазири лавозими этиб қайта номланади.
«Туризм ва маданий мерос вазирлиги фаолиятини ташкил этиш тўғрисида»ги қарор билан вазирлик тизимида неча нафар ходим ишлаши белгиланди. Унга кўра, Туризм ва маданий мерос вазирлиги марказий аппаратининг бошқарув ходимлари чекланган сони 84 нафар, вазирликнинг ҳудудий бўлинмалари бошқарув ходимларининг чекланган сони эса 386 нафар бўлади.
Шавкат Мирзиёев, бундан ташқари, «Спортни ривожлантириш вазирлиги фаолиятини ташкил этиш тўғрисида»ги қарорни ҳам имзолади. Унда айтилишича, Спортни ривожлантириш вазирлиги марказий аппаратининг бошқарув ходимлари чекланган сони 76 нафар, вазирликнинг ҳудудий бўлинмалари бошқарув ходимларининг чекланган сони 594 нафар этиб белгиланган.
Эслатиб ўтамиз, Олий Мажлис Қонунчилик палатасининг 18 февраль куни бўлиб ўтган мажлисида Туризм ва спорт вазирлигини алоҳида Туризм ва маданий мерос ҳамда Спортни ривожлантириш вазирликларига ажратиш масаласи кўриб чиқилган.
Шавкат Мирзиёев шу муносабат билан тайинловлар амалга оширган. Қайд этилишича, президентнинг тегишли фармонлари билан Азиз Абдуҳакимов бош вазирнинг ўринбосари — туризм ва маданий мерос вазири лавозимига, Адҳам Икрамов спортни ривожлантириш вазири лавозимига тайинланди.
Изоҳ (0)