Polsha Rossiya bilan chegarada devor qurishni rejalashtirmoqda. Bu haqda Polsha milliy mudofaa vaziri o‘rinbosari Voyseh Skurkevichning bayonotiga asoslanib, Polshaning PAP axborot agentligi xabar berdi.
“Polsha—Rossiya chegarasida hali devor qurmayapmiz, bu haqda e’lon qildik, xolos”, — dedi Skurkevich jurnalistlarning savollariga javob berarkan. Uning qo‘shimcha qilishicha, devor qurish rejalari Polsha chegara qo‘riqlash xizmatini rivojlantirish konsepsiyasiga kiritilgan.
Polsha Rossiyaning Kaliningrad viloyati bilan chegaradosh. Chegaraning quruqlikdagi qismi uzunligi 203,3 kilometrni tashkil etadi.
Kaliningrad viloyati hukumati matbuot xizmati rahbari Dmitriy Liskovning “RIA Novosti”ga aytishicha, Rossiya—Polsha chegarasida Rossiya tomonda avvaldan panjara bor. Polsha tomonida esa yo‘q, shu sababli mamlakat uni qurmoqchi. Gap aynan panjara haqida ketmoqda, devor haqida emas, dedi Liskov.
2022-yilning yanvar oyida Polsha Belarus bilan chegarada devor qurishni boshladi. Uning uzunligi 186 kilometr, balandligi besh metrdan oshadi. 644 million Polsha zlotiysi (162 million dollar) qiymatidagi qurilish iyun oyida yakunlanishi rejalashtirilgan.
Polsha migratsiya inqirozi tufayli Belarus bilan chegarada devor qurishga majbur bo‘lmoqda. Litva ham shunday panjara qurishga qaror qilgan.
Izoh (0)