Россия президенти Владимир Путин ўзини ўзи мустақил давлат деб эълон қилган, мустақиллиги тан олинмаган Донбасс Халқ Республикаси ва Луганск Халқ Республикаси ҳудудларидан Ростов вилоятига келган ҳар бир одамга 10 минг рублдан тарқатиш ҳақида топшириқ берди. Бу ҳақда «ТАСС» хабар қилган.
Россия ҳукумати мазкур маблағлар захира жамғармаси ҳисобидан қопланишини билдирган.
Шунингдек, Путин Россия фавқулодда вазиятлар вазири вазифасини вақтинча бажарувчи Александр Чприянга Ростов вилоятига дарҳол етиб бориш ҳамда ЛХР ва ДХРдан келганлар учун зарур шарт-шароитларни яратишни буюрган.
Ростов вилоятида икки ҳудуддан келганларни эвакуация қилиш бўйича тезкор штаб ташкил қилинган.
ДХР ва ЛХР ҳукуматлари аҳолининг Россияга эвакуация қилиниши ҳақида 18 февралда маълум қилган. Улар мазкур ҳолатни ҳудуддаги вазиятнинг кескинлашгани билан изоҳлаган. Хабарларга кўра, икки ҳудуддан эвакуация қилинадиган одамлар ўтирган автобуслар маҳаллий вақт билан соат 20:00 да йўлга чиққан.
Ўз навбатида, Украина расмийлари Донбассга ҳеч қандай ҳужум операцияларини бошлашни режалаштирмаётганини таъкидлаган.
Аввал Кремль Донецк ва Луганск мустақиллигини тан олиш Минск келишувларини бузиши ҳақида баёнот бергани, Зеленский Донбассда Украина ОАВларининг таъсирини кучайтиришга чақиргани, кейинчалик Украина президентининг Донбассда бир суткадан камроқ вақт ичида 500 га яқин портлаш қайд этилгач у ерга боргани, Россия ва АҚШдан Украина учун хавфсизлик кафолатларини талаб қилгани, шунингдек, Путинга «исталган форматда» учрашишни таклиф этгани ҳақида хабарлар берилганди.
Изоҳ (0)