Saudiya Arabistoni tarixida birinchi marta temiryo‘l kompaniyasi 30 nafar ayolni mashinist sifatida yollamoqchi. Vakansiya bo‘yicha 28 mingta ariza kelib tushgan

Saudiya Arabistonida mamlakat tarixida birinchi marta 30 nafar ayolni mashinist sifatida ishga yo‘llash to‘g‘risida vakansiya e’lon qilingandi. E’lon bo‘yicha 28 mingdan ortiq ariza kelib tushdi. Bu haqda Makka va Madina o‘rtasida tezyurar poyezdlar harakati uchun mas’ul bo‘lgan Ispaniyaning Renfe temiryo‘l kompaniyasi xabar berdi.

Kompaniya bir oy ichida juda ko‘plab arizalarni qabul qildi. Akademik faoliyati va ingliz tilini bilish darajasini baholovchi onlayn test sinovlaridan so‘ng nomzodlar soni ikki baravarga qisqarib, 14 ming kishiga tushgan.

Mart oyining o‘rtalariga qadar kompaniya 30 nafar nomzodni saralab oladi. Bir yillik treningdan so‘ng ayollar Makka va Madina o‘rtasida har yili millionlab musulmon ziyoratchilarni tashiydigan poyezdlarni boshqaradi.

Al-Jazeera xabariga ko‘ra, yaqin vaqtgacha saudiyalik ayollar o‘qituvchi yoki tibbiyot xodimi bo‘lib ishlashi mumkin edi. So‘nggi yillarda hukumat qator islohotlarni amalga oshirdi, buning natijasida 2020-yil oxiriga kelib mamlakatdagi barcha mehnatkashlar orasida ayollar salmog‘i 33 foizgacha oshdi. Shunga qaramay, erkaklar, ayniqsa, davlat sektorida ko‘pchilik lavozimlarni egallab turibdi.

So‘nggi yillarda Saudiya Arabistoni ayollarga erkak vasiylar qaramog‘isiz yashash, mashina haydash, erkaklar ruxsatisiz xorijga chiqish, futbol o‘yinlariga borish, armiyada xizmat qilish imkonini berdi. Ammo katta ijtimoiy islohotlarga qaramay, saudiyalik ayollar erkak vasiyning ruxsatisiz turmushga chiqa olmaydi, qamoqdan ozod etilmaydi yoki muayyan tibbiy xizmatlardan foydalana olmaydi, deb yozadi BBC News.