Checheniston yetakchisi Ramzan Qodirov Rossiya Davlat dumasining Donetsk va Lugansk xalq respublikalarini (DXR va LXR) tan olish masalasi bo‘yicha prezidentga murojaat qilish to‘g‘risidagi qarorini “to‘liq qo‘llab-quvvatlashini” ma’lum qildi. Bu haqda u o‘zining Telegram’dagi sahifasiga yozib qoldirgan.
“Vladimir Vladimirovich (Putin) — uzoqni ko‘ra biladigan va dono siyosatchi. O‘ylaymanki, u, albatta, tinchlik uchun shunday muhim qadamni tashlaydi”, — deb yozadi Qodirov.
Qodirovning ta’kidlashicha, o‘zini o‘zi respublika deb e’lon qilgan DXR va LXR aholisi “ko‘p yillar davomida qonunsizlik azobi ostida yashab kelmoqda” va ularning o‘z taqdirini o‘zi belgilash huquqiga e’tibor qaratilmayapti. “Bunday vaziyatda aynan mustaqillikning tan olinishi ularning xalqaro maydondagi mavqeyini belgilab beradi va ko‘p yillik qarama-qarshilik hamda qon to‘kilishiga chek qo‘yadi”, — deb hisoblaydi Checheniston rahbari.
Uning so‘zlariga ko‘ra, chechen xalqi “bu kabi umidsizlik tuyg‘usini” eslaydi va “o‘zboshimchalik, zo‘ravonlik va uzluksiz jangovar harakatlar” nimaga olib kelishi mumkinligini tushunadi.
“Donetsk va Luganskda tinchlik sizning gaplaringizdan keyin o‘rnatiladi, Vladimir Vladimirovich!”, — deydi Qodirov.
Uning qayd etishicha, Rossiyaning “bosqini” va urush e’lon qilish ehtimolligi sanasiga oid xabarlar orqali Rossiya, DXR va LXRga qarshi “keng miqyosli axborot kampaniyasi” olib borilmoqda. Ammo Ukraina “sakkiz yildan beri qo‘shnilari bilan shunday urush olib bormoqda”, xorij ommaviy axborot vositalari bu haqda sukut saqlashni afzal ko‘rmoqda, deydi respublika rahbari.
Qodirovning ta’kidlashicha, Putinning shunday vaziyatda “tinchlikparvarlik missiyasini” o‘z zimmasiga olishi “mantiqiyroq” bo‘ladi, chunki rasmiy Kiyev Minsk kelishuvlariga rioya qilmoqchi emas va muammoni tinch yo‘l bilan hal qilish yo‘llarini qidirmayapti.
19-yanvar kuni mamlakatdagi Kommunistik partiya deputatlarining bir guruhi Putindan DXR va LXRni tan olish borasidagi iltimos bilan murojaatni Rossiya Davlat dumasiga kiritgandi. “Yagona Rossiya” partiyasi ham yana bir loyiha tayyorlagan — MDH ishlari, Yevroosiyo integratsiyasi va vatandoshlar bilan aloqalar qo‘mitasi rahbarining birinchi o‘rinbosari Viktor Vodolatskiy va qo‘mita raisi o‘rinbosari Artem Turov. Ular Tashqi ishlar vazirligi bilan konsultatsiya o‘tkazish taklifini bergan.
Rossiya Davlat dumasi 15-fevral kuni murojaatni prezidentga yuborishga qaror qilgan. Putin hujjatni izohlar ekan, Donbassdagi muammoni hal etish uchun barcha zarur ishlarni qilish kerakligini, “biroq bularning barchasini, birinchi navbatda Minsk kelishuvlarini amalga oshirish imkoniyatlaridan kelib chiqib bajarish” lozimligini ma’lum qilgan.
Avvalroq Checheniston rahbari Telegram-kanalida Ukraina prezidenti Vladimir Zelenskiy va mamlakat xalqiga murojaat yo‘llagandi. U o‘z postining boshida yozayotgan fikrlari Rossiyaning oddiy fuqarosi nomidan bildirilayotganini qayd etgan.
“Janob Zelenskiy! Masxarabozlik vaqti poyoniga yetdi. Yomon oqibatlarga olib keladigan va ortga qaytarishning imkoni yo‘q bo‘lgan voqea-hodisalarning oldini olish, o‘z xalqiga berilgan va’dalarni bajarish payti keldi. Ya’ni bugun Minsk shartnomasida belgilangan talablarni bajarish zaruriyatga aylandi va buning ayni fursati”, — deb yozgan Qodirov.
Izoh (0)