AQSh prezidenti Jo Bayden 15-fevral kuni Ukraina atrofidagi vaziyat yuzasidan videomurojaat yo‘lladi. Uning murojaati “Amerika ovozi” tomonidan translyatsiya qilindi.
AQSh davlat rahbari eng birinchi navbatda mamlakatning Yevropada xavfsizlikni ta’minlash yo‘nalishida Rossiya bilan diplomatik muloqotga, shuningdek, Ukrainaga nisbatan zo‘ravonliklarga keskin javob qaytarishga tayyorligini ta’kidladi.
Jumladan, Oq uy rahbari Vashingtonning Moskva bilan xavfsizlik yo‘nalishida yozma kelishuvlar tuzishga tayyorligini bildirdi. Shu bilan birga, Qo‘shma shtatlarning Ukrainaga raketalarini joylashtirmagani va joylashtirmasligi, biroq NATO eshiklarini ham yopmasligini aytib o‘tdi.
Bayden Rossiyaning Ukraina chegarasidagi harbiylarning boshqa manzilga o‘tkazilishini olqishladi, ammo ushbu axborot hali rasman o‘z tasdig‘ini topmaganini qayd etdi. Uning so‘zlariga ko‘ra, bugungi kunda Ukraina chegarasida 150 mingga yaqin Rossiya askarlari bor.
AQSh prezidenti Rossiya Ukrainaga hujum qilsa, Vashington va uning ittifoqchilari Moskvaga nisbatan o‘ta kuchli – eksport nazorati, moliya sohalarida sanksiyalar qo‘llashi, “Shimoliy oqim - 2” gaz quvuri ham to‘xtatilishi haqida ogohlantirdi.
“Ukrainaga hujum o‘z oyog‘ini to‘pponcha bilan yaralashga teng harakat. G‘arb birlashadi”, — degan Bayden.
Shuningdek, Jo Bayden urush boshlanadigan bo‘lsa, Ukrainaga harbiylarni yubormasligi, lekin Ukrainadagi amerikaliklarga talafot yetsa, Vashington bunga keskin va shafqatsiz javob berishini va’da qildi.
“Rossiya va AQSh oldida tanlov bor. Muammoni urush orqali emas, aksincha diplomatik yo‘l bilan hal etish kerak”, — deya qo‘shimcha qilgan Bayden.
Eslatib o‘tamiz, 11-fevralda Bayden AQSh ittifoqchilari bilan muzokaralar vaqtida Rossiyaning 16-fevral kuni Ukrainaga bostirib kirishi mumkinligi haqida ogohlantirgan. Kreml ushbu axborotni inkor qilgan va G‘arbni Yevropada keskinlikni oshirish uchun mislsiz kampaniyani (provokatsiya va fitna) boshlashda ayblagan.
15-fevral kuni Rossiya mudofaa vazirligi G‘arbiy va Janubiy harbiy okruglarning harbiy bo‘linmalari o‘quv mashg‘ulotlarini yakunlab harbiy qismlarga qaytayotganini e’lon qilgan. Biroq ushbu ma’lumot hali rasman o‘z tasdig‘ini topmagan.
Avval AQSh Rossiyaning Ukraina bilan chegara hududidan harbiy qo‘shinlarning bir qismini boshqa yerga ko‘chirilganini tekshirib, barchasiga ishonch hosil qilmoqchiligi, Putin Rossiyaning Ukraina bilan urishishni istamasligini ma’lum qilgani haqida xabarlar berilgan.
Izoh (0)