Чеченистон етакчиси Рамзан Қодиров Россия Давлат думасининг Донецк ва Луганск халқ республикаларини (ДХР ва ЛХР) тан олиш масаласи бўйича президентга мурожаат қилиш тўғрисидаги қарорини «тўлиқ қўллаб-қувватлашини» маълум қилди. Бу ҳақда у ўзининг Telegram’даги саҳифасига ёзиб қолдирган.
«Владимир Владимирович (Путин) — узоқни кўра биладиган ва доно сиёсатчи. Ўйлайманки, у, албатта, тинчлик учун шундай муҳим қадамни ташлайди», — деб ёзади Қодиров.
Қодировнинг таъкидлашича, ўзини ўзи республика деб эълон қилган ДХР ва ЛХР аҳолиси «кўп йиллар давомида қонунсизлик азоби остида яшаб келмоқда» ва уларнинг ўз тақдирини ўзи белгилаш ҳуқуқига эътибор қаратилмаяпти. «Бундай вазиятда айнан мустақилликнинг тан олиниши уларнинг халқаро майдондаги мавқейини белгилаб беради ва кўп йиллик қарама-қаршилик ҳамда қон тўкилишига чек қўяди», — деб ҳисоблайди Чеченистон раҳбари.
Унинг сўзларига кўра, чечен халқи «бу каби умидсизлик туйғусини» эслайди ва «ўзбошимчалик, зўравонлик ва узлуксиз жанговар ҳаракатлар» нимага олиб келиши мумкинлигини тушунади.
«Донецк ва Луганскда тинчлик сизнинг гапларингиздан кейин ўрнатилади, Владимир Владимирович!», — дейди Қодиров.
Унинг қайд этишича, Россиянинг «босқини» ва уруш эълон қилиш эҳтимоллиги санасига оид хабарлар орқали Россия, ДХР ва ЛХРга қарши «кенг миқёсли ахборот кампанияси» олиб борилмоқда. Аммо Украина «саккиз йилдан бери қўшнилари билан шундай уруш олиб бормоқда», хориж оммавий ахборот воситалари бу ҳақда сукут сақлашни афзал кўрмоқда, дейди республика раҳбари.
Қодировнинг таъкидлашича, Путиннинг шундай вазиятда «тинчликпарварлик миссиясини» ўз зиммасига олиши «мантиқийроқ» бўлади, чунки расмий Киев Минск келишувларига риоя қилмоқчи эмас ва муаммони тинч йўл билан ҳал қилиш йўлларини қидирмаяпти.
19 январь куни мамлакатдаги Коммунистик партия депутатларининг бир гуруҳи Путиндан ДХР ва ЛХРни тан олиш борасидаги илтимос билан мурожаатни Россия Давлат думасига киритганди. «Ягона Россия» партияси ҳам яна бир лойиҳа тайёрлаган — МДҲ ишлари, Евроосиё интеграцияси ва ватандошлар билан алоқалар қўмитаси раҳбарининг биринчи ўринбосари Виктор Водолацкий ва қўмита раиси ўринбосари Артем Туров. Улар Ташқи ишлар вазирлиги билан консультация ўтказиш таклифини берган.
Россия Давлат думаси 15 февраль куни мурожаатни президентга юборишга қарор қилган. Путин ҳужжатни изоҳлар экан, Донбассдаги муаммони ҳал этиш учун барча зарур ишларни қилиш кераклигини, «бироқ буларнинг барчасини, биринчи навбатда Минск келишувларини амалга ошириш имкониятларидан келиб чиқиб бажариш» лозимлигини маълум қилган.
Аввалроқ Чеченистон раҳбари Telegram-каналида Украина президенти Владимир Зеленский ва мамлакат халқига мурожаат йўллаганди. У ўз постининг бошида ёзаётган фикрлари Россиянинг оддий фуқароси номидан билдирилаётганини қайд этган.
«Жаноб Зеленский! Масхарабозлик вақти поёнига етди. Ёмон оқибатларга олиб келадиган ва ортга қайтаришнинг имкони йўқ бўлган воқеа-ҳодисаларнинг олдини олиш, ўз халқига берилган ваъдаларни бажариш пайти келди. Яъни бугун Минск шартномасида белгиланган талабларни бажариш заруриятга айланди ва бунинг айни фурсати», — деб ёзган Қодиров.
Изоҳ (0)