Буюк Британия Киевдаги дипломатик ходимларининг бир қисмини Украина ғарбига кўчирди. Бу ҳақда қироллик ТИВ раҳбари Лиз Трассга таяниб, Reuters хабар берди.
Шу билан бирга, у Киевдаги дипломатик алоқалар сақланиб қолишига аниқлик киритган.
«Биз Европада уруш ёқасига бориб қолишимиз мумкин», — дея ҳисоблайди Трасс. Британия ташқи ишлар вазирининг сўзларига кўра, у Россия «Украина билан чекланиб қолмаслигидан» хавотирда. Вазир Шарқий Европадаги бошқа мамлакатларга ҳужум уюштирилиши мумкинлигини истисно этмаган, бу эса «бошқа тажовузкорларнинг» амбицияларини рағбатлантириши мумкин.
Трасснинг Британия разведкасига таяниб таъкидлашича, президент Владимир Путин «ҳужум қилиш» бўйича ҳали қарор қабул қилмаган. Шунга қарамай, Украинага ҳужум «жуда тез» ва «бошқа байроқ остида» амалга оширилиши мумкин. У Лондон энг ёмонини кутаётганини қўшимча қилган.
Бир кун аввал Трасс британияликларни тижорий рейслар мавжудлигида Украинани зудлик билан тарк этишга чақирганди. 14 февраль куни АҚШ Украинадаги элчихонасини Киевдан Лвовга кўчириши маълум бўлди. Дипломатик миссиянинг компьютер ва тармоқ қурилмалари йўқ қилинади.
Тобора таранглашиб бораётган Россия—Украина ўртасидаги вазият ортидан кўплаб мамлакатлар ўз фуқароларини Украинани зудлик билан тарк этишга чақирмоқда. 10 февралда АҚШ давлат департаменти фуқароларга Украинага бормаслик ёки зудлик билан Россия ҳарбий ҳаракатлари хавфи бўлган ва COVID-19 билан касалланишлар кўпайган ҳудуддан кетишни тавсия этди. АҚШ президенти Жо Байден Украинадаги барча америкаликларни ҳозироқ мамлакатдан кетишга чақирди. АҚШдан кейин Нидерландия, Черногория, Япония, Латвия, Буюк Британия ва Жанубий Корея ҳам фуқароларидан Украинага бормасликни сўради.
Изоҳ (0)